Сейшель аралдарының құрамына кіретін Альдабра атоллында ғалымдар 183 мыңға жуық алып тасбақаны санап шықты. Бұл көрсеткіш елдің бүкіл халқының санынан да көп, деп хабарлайды infohub.kz сайты.
Зерттеушілер Альдабра атоллындағы алып тасбақалар популяциясын ауқымды түрде қайта бағалады. Нәтижесінде бұл аумақта 183 мыңға жуық ересек және жас тасбақа мекендейтіні анықталды. Жаңа көрсеткіш бұрынғы 100 мың дарақ деген бағадан айтарлықтай жоғары. Алайда зерттеу авторлары бұл санының күрт өсуі емес, санаудың дәлірек әдістерінің нәтижесі екенін атап өтті. Бұған дейін қалың өсімдік пен көлеңкеге байланысты көптеген жануар назардан тыс қалып келген.
XIX ғасырда бақылаусыз аулау салдарынан Альдабрадағы алып тасбақалардың саны бір мыңнан да азайып кеткен еді. Атолл қатаң табиғи қорық деп жарияланып, кейін ЮНЕСКО-ның Бүкіләлемдік мұра тізіміне енгізілген соң жағдай өзгерді. Қазіргі таңда популяция тұрақты әрі қалыпты деп бағаланып отыр.
Саны қалпына келгенімен, бауырымен жорғалаушылар жаңа қауіптерге тап болып отыр. Ұзаққа созылған құрғақшылық азық пен паналайтын жерді азайтады, мұхит деңгейінің көтерілуі атоллдың аласа бөліктеріне қауіп төндіреді, ал қаңғыбас мысықтар мен қара егеуқұйрықтар жұмыртқа мен төлді қырып жатыр.