Қазақстандық теннисші Александр Шевченко (әлемдік рейтингте 100-орын) бір күнде екі жеңіске қол жеткізіп, Кәсіби теннисшілер қауымдастығының (АТП) 250 санатындағы Swiss Open Gstaad-2026 турнирінің жартылай финалына шықты, деп хабарлайды infohub.kz.
Алдымен Шевченко кеше жаңбырға байланысты үзілген швейцариялық Доминик Штрикермен (360) кездесуді 7:6 (7:5), 6:2 есебімен аяқтады. Содан кейін ширек финалда француз Кентен Алисті (90) 7:6 (7:5), 6:3 есебімен ұтты. Ойын 1 сағат 37 минутқа созылды. Шевченко эйстер бойынша қарсыласынан қалыс қалды (4:7), бірақ брейктерде (1:0) және жалпы жинаған ұпайларда (75:64) басым түсті.
Одан бір күн бұрын Алис Қазақстанның бірінші ракеткасы Александр Бубликті (11) 6:7 (4:7), 6:4, 7:6 (7:5) есебімен жеңді. Осылайша Бублик өткен жылғы титулын қорғай алмады. Дегенмен, кубок басқа бір қазақстандыққа бұйыруы мүмкін. Шевченконың жартылай финалдағы қарсыласы кейін анықталады.
Swiss Open Gstaad турнирі — Швейцарияның теннистен ашық чемпионаты — 1915 жылдан бері өткізіліп келеді. 1967 жылға дейін ол әртүрлі қалаларда өтті, ал 1968 жылдан бастап тұрақты орны — Швейцария Альпісіндегі танымал тау шаңғысы курорты Гштаад. Бұл Еуропадағы ең биік таулы АТП турнирі саналады (теңіз деңгейінен 1050 метр). 2009 жылдан бастап турнир АТП-250 санатына жатады. Жалпы жүлде қоры 612,5 мың еуроны құрайды.
Әр жылдары Swiss Open Gstaad турнирінде швейцариялық Роджер Федерер, ресейлік Евгений Кафельников, швед Стефан Эдберг, аргентиналық Гильермо Вильяс және басқа да жұлдыздар жеңіске жеткен.