Шығыс Қазақстан облысында «Aк Metal» ЖШС басшысы Данияр Бектемиров бір жылға бас бостандығынан айырылды, деп хабарлайды infohub.kz.
Тергеу барысында анықталғандай, серіктестіктің лицензиясы тек қатты пайдалы қазбаларды барлауға ғана рұқсат берген. Алайда зертханалық және технологиялық зерттеулер деген желеумен іс жүзінде темір рудасы мен темір рудасы концентратын өнеркәсіптік түрде өндіріп, оны ел ішінде де, шетелге де сатқан.
Заңсыз жұмыстардың салдарынан топырақ жамылғысы бұзылып, табиғи рельеф пен ландшафт өзгерген, тау-кен қазбалары мен үйінділер пайда болып, аумаққа айтарлықтай техногендік әсер еткен.
Барлығы 70 мың тоннадан астам өнім заңсыз өндіріліп, сатылған, ал алынған қылмыстық табыс 1 миллиард теңгеден асқан.
Осы ақшаға кәсіпорын басшысы қымбат активтер сатып алған: Land Rover автокөлігі, бес бөлмелі пәтер, үш коммерциялық үй-жай, екі тұрақ орны және Алматы мен Алматы облысындағы екі жер телімі.
Сот аталған мүлікті, құны 1 миллиард теңгеден астам, мемлекет кірісіне тәркіледі. Үкім заңды күшіне енген жоқ.