Жамбыл облысында ер адам жанармай бекетіндегі дүкен кассиріне қызғаныш көрінісін жасап, 10 тәулікке қамалды. Сондай-ақ оған үш ай бойы алкоголь ішуге тыйым салынды, деп хабарлайды infohub.kz сайты.
Жамбыл облысы соттарының ресми Telegram-арнасында мәлім болғандай, Шу аудандық соты жанармай бекетінде ұсақ бұзақылық жасаған ер адамға қатысты әкімшілік құқық бұзушылық туралы істі қарады (Әкімшілік құқық бұзушылық туралы кодекстің 434-бабының 1-бөлігі).
Анықталғандай, 2026 жылдың тамызында түнгі уақытта ер адам Шу қаласындағы жанармай бекетінің жанындағы дүкенге келген. Алкогольдік масаң күйде болған ол кассир болып жұмыс істейтін таныс әйелге балағат сөздер айтып, сөреде тұрған сусын бөтелкесін сындырған. Осылайша ол қоғамдық тәртіпті және айналасындағылардың тыныштығын бұзған.
Кінәсі хаттамамен, тараптардың жауабымен және полиция қызметкерінің баянатымен дәлелденді.
Сотта ер адам кінәсін толық мойындап, бұл әрекеттерді қызғаныштан жасағанын түсіндірді.
Жәбірленуші әйел ер адамның оның бетінен ұрғанын да айтты. Сонымен қатар ол бұл фактіге қатысты шағымы жоқ екенін және оны кешіргенін мәлімдеді.
Сот кінәні толық мойындауды жеңілдететін мән-жай деп таныды, ал құқық бұзушылықтың алкогольдік масаң күйде жасалуын ауырлататын мән-жай ретінде есепке алды.
Сот қаулысымен ер адам Әкімшілік құқық бұзушылық туралы кодекстің 434-бабының 1-бөлігі бойынша кінәлі деп танылып, оған 10 тәулікке қамау жазасы тағайындалды. Бұдан бөлек, оған 3 ай бойы алкоголь, есірткі және психотроптық заттарды қолдануға тыйым салынып, профилактикалық әңгімелесу үшін айына екі рет учаскелік полиция пунктіне келу міндеттелді.
Қаулы заңды күшіне енді.