29 тамызда Ақтаудағы Амфитеатр алаңында 15 мыңнан астам қонақ пен қала тұрғынын жиған республикалық шұбат фестивалі SHUBAT FEST-2026 өтті. Іс-шараға Маңғыстау, Атырау, Қызылорда және Түркістан облыстарының өкілдері, сондай-ақ Маңғыстау облысы әкімінің орынбасары Тілек Жеткізгенұлы қатысты, деп хабарлайды infohub.kz сайты.
Облыстық әкімдікте атап өткендей, фестивальдің басты мақсаты — шұбатты ұлттық өнім ретінде танымал ету, оны дайындау дәстүрлерін сақтау, түйе шаруашылығын дамыту және отандық өнімді заманауи форматта ілгерілету.
Орталық оқиға — үздік шұбат байқауы болды. Барлығы 83 өтінім түсіп, оның 41-і алдын ала іріктеуден өтті. Өнімдерді зертханалық зерттеуден кейін финалдық кезеңге 20 қатысушы жіберілді, солардың арасынан «Үздік шұбат» номинациясы бойынша жеңімпаздар анықталды.
Төрт өңірден келген кәсіпкерлер мен шаруа қожалықтары өз өнімдерін ұсынды. Фестиваль қонақтары шұбаттың түрлі түрлерін, сондай-ақ құрт, балқаймақ, десерттер, кофе, балмұздақ және түйе сүтінен жасалған коктейльдерді татты. Үздік өнімдер халық дауысымен таңдалды.
Сусынның сапасына, құрамына және дайындау дәстүрлеріне ерекше көңіл бөлінді. Фестиваль аясында тәжірибелі шеберлер мен шұбат дайындау құпиясын меңгеріп жатқан жас мамандармен сұхбаттар өтті. Сарапшылар түйе сүтінің тағамдық құндылығы мен ерекшеліктері туралы айтты.
Марапаттау рәсімінің алдында Маңғыстау облысы әкімінің орынбасары Тілек Жеткізгенұлы құттықтау сөз сөйледі. Ол ата-баба дәстүрін сақтап, ұлттық өнім өндірісін дамытып жатқан шаруа қожалықтарының еңбегін атап өтіп, облыс тұрғындары мен қонақтарына отандық өнімді қолдағаны үшін, фестиваль ұйымдастырушылары мен демеушілеріне алғыс білдірді.
Байқау қорытындысы бойынша қосымша номинацияларда түйе сүтінен жасалған үздік құрт, балқаймақ, десерт, кофе, балмұздақ және коктейль ұсынған қатысушылар жеңімпаз атанды.
«Үздік шұбат» басты номинациясында үшінші орынды Маңғыстау облысы Бейнеу ауданының «Нұр-Абыл» шаруа қожалығы, екінші орынды Атырау облысы Жылыой ауданының «Орынбасар» шаруа қожалығы иеленді. Бірінші орынды Ақтаудағы «Толқын» шаруа қожалығы жеңіп алды. Фестивальдің бас жүлдесін Маңғыстау облысы Жаңаөзен қаласындағы «Бірлік» шаруа қожалығы алды. Жеңімпазға ресми демеуші — Astana Motors компаниясы GWM Poer автокөлігін табыс етті.
Қонақтарға арналған мерекелік бағдарламаны Маңғыстау облыстық филармониясының әртістері, Рахымжан Жақайым, Жұбаныш Жексенұлы және «Жігіттер» квартеті ұсынды.
SHUBAT FEST-2026 республикалық фестивалі шұбатты танымал ету, отандық өндірушілерді қолдау және түйе шаруашылығын дамытудың ауқымды алаңына айналды. Төрт облыстың қатысуы мен 15 мыңнан астам келушінің қызығушылығы ұлттық өнімге және оны өндіру дәстүрлеріне жоғары қоғамдық қызығушылықты растады.