Маңғыстау облысында Қазақстандағы алғашқы жоба — оқушылардың рационына ұлттық сусынды жүйелі түрде енгізу басталады. Қыркүйектен бастап Жаңаөзеннің 25 мектебінде балаларға түйе сүтінен жасалған дәстүрлі сусын — табиғи шұбат фастфудқа пайдалы балама ретінде беріле бастайды, деп хабарлайды infohub.kz сайты.
Жобаның бастамашысы, Маңғыстау облысының әкімі Нұрдәулет Қилыбай мектеп тамақтануының жаңа бағдарламасын іске қосуды Мемлекет басшысы Қасым-Жомарт Тоқаевтың кәмелетке толмағандарды зиянды тағамнан қорғау жөніндегі соңғы тапсырмаларымен байланыстырды.
«Бүгін Мемлекет басшысы Қасым-Жомарт Тоқаев фастфудтың агрессивті жарнамасы мәселесіне және өскелең ұрпақтың денсаулығын қорғауға ерекше назар аудару қажеттігіне тоқталды. Біздің шұбатты мектеп тамақтануына енгізу жөніндегі бастамамыз — осы бағыттағы нақты қадам. Біз жергілікті өндірістің табиғи және сапалы өнімдері балаларымызға қолжетімді болуын қамтамасыз етуіміз керек», — деді өңір басшысы.
Мемлекет басшысы зиянды тағамды насихаттау елдің еңбек әлеуетіне тікелей теріс әсер етіп, денсаулық сақтау жүйесіне қосымша жүктеме тудыратынын айтқан болатын.
«Дәрігерлердің бақылауы бойынша, қазір қант диабетімен ауыратын 7 мыңға жуық бала бар және бұл көрсеткіш азаймай, тіпті өсіп отыр. Көптеген мемлекеттер өскелең ұрпаққа бағытталған құрамында майы, қанты және тұзы жоғары өнімдердің жарнамасына тыйым салады немесе шектейді», — деп атап өтті Қасым-Жомарт Тоқаев.
Маңғыстау облысындағы жоба 26 тамызда салтанатты түрде ашылған «Нар-Бота» шұбат құюдың жаңа цехының базасында жүзеге асырылуда. Өндіріс алаңы 300 шаршы метрді алып жатыр, ал кәсіпорынның жобалық қуаты жылына 400 тонна дайын өнім шығаруға есептелген.
Технологиялық тізбек барлық негізгі кезеңдерді қамтиды: шикі түйе сүтін қабылдау, оны өңдеу, құю және кейіннен сақтау. Өндіріс алаңының ашылуы түйе шаруашылығына маманданған жергілікті фермерлік шаруашылықтар үшін тұрақты өткізу нарығын қалыптастырады және өңірде табиғи шикізатқа ұзақ мерзімді сұранысты қамтамасыз етеді.