«Шұғыла Gold» алтын өндіретін компаниясы 2025 жылдың қорытындысы бойынша 4,76 млрд теңге пайда тапты. Ал 2024 жылы оның шығыны 4,8 млрд теңге болған. Бұл туралы кәсіпорынның қаржылық есептілігінде айтылған, деп хабарлайды infohub.kz сайты.
Компанияның 2025 жылғы түсімі 9,7 млрд теңгеге жетті, ал бір жыл бұрын бұл көрсеткіш 281,1 млн теңге еді. 2024–2025 жылдары түсімнің барлығы Доре қорытпасын сатудан түскен кіріс есебінен қалыптасты. Ондағы алтын мен күмістің үлесі кемінде 70% болуы тиіс. 2025 жылдың соңында жабылмаған шығын 7,77 млрд теңгеден 3,06 млрд теңгеге дейін қысқарды.
Абай облысындағы Ақжал ауылында тіркелген «Шұғыла Gold» компаниясының жалғыз иесі — «Шұғыла Кент» компаниясы. Екі құрылымның да басшысы — Ерғалым Садақов. Өз кезегінде «Шұғыла Кенттің» иесі — KST Production компаниясы. KST Production-ның бірлескен иелері ретінде Абзал Нуриев пен Тәслима Сарсебаева көрсетілген. Абзал Нуриев сонымен қатар Ақтөбедегі Azit компаниясына иелік етеді.
«Шұғыла Gold» қатты пайдалы қазбаларды геологиялық барлауға екі лицензия мен өндіруге екі келісімшартқа ие. Компанияның негізгі қызмет түрі — асыл металдар мен сирек металл кендерін өндіру деп көрсетілген.
Бұған дейін «Шұғыла Gold» компаниясының түпкілікті иелері қазақстандықтар Әсел Медеуова мен Бақытжан Сейітжан болған. Компания 2026 жылы Шығыс Қазақстан облысының Жарма ауданындағы Бюкуй өзені аңғары мен Балка Колорадо учаскесінде шашыраңқы алтын өндіруді бастауды жоспарлаған, деп жазған «Курсив». Бұл учаскедегі С1 санаты бойынша расталған қорлар таза асыл металдың 202,4 келісін құрайды.
Сонымен қатар «Шұғыла Gold» 2027 жылы Абай облысының Жарма ауданындағы Ақдингек кен орнында құрамында алтыны бар кенді өнеркәсіптік өндіруді бастауды жоспарлаған. Өндіруді жылына 100 мың тонна құрамында алтыны бар кен өндіретін жобалық қуаты бар карьерде ашық әдіспен жүргізу көзделген. Барлық алтынды бес жылда — 2027 жылдан 2031 жылға дейін алу жоспарланған.