Шымкенттегі бірінші қалалық клиникалық аурухананың хирургтары бүйрек жеткіліксіздігінің соңғы сатысындағы науқасқа бүйрек трансплантациясын жасады. Науқас көп жыл бойы гемодиализ аппаратына тәуелді болған. Орган туыс болып келетін донордан алынды, деп хабарлайды infohub.kz сайты.
Мегаполистің денсаулық сақтау басқармасы нақтылағандай, науқастың негізгі диагнозы — тубулоинтерстициалды нефриттен дамыған созылмалы терминалдық бүйрек жеткіліксіздігі.
Операция алдында екі науқас та мұқият медициналық тексеруден өтіп, барлық қажетті құжатқа қол қойды. Трансплантация сәтті өтті, қазір донор мен реципиент дәрігерлердің бақылауында реанимацияда жатыр.
Дәрігерлердің айтуынша, екі науқастың да жағдайы тұрақты, барлық өмірлік көрсеткіштері қалыпты. Трансплантацияланған бүйрек өз міндетін сәтті атқарып, тиісті деңгейде жұмыс істеп тұр. Науқастар мамандардың қадағалауымен қажетті ем қабылдауды жалғастыруда.
Шымкент әкімдігінің мәліметінше, бұл — шымкенттік хирургтар жасаған 255-ші сәтті бүйрек трансплантациясы.
Бұған дейін Денсаулық сақтау министрлігі хабарлағандай, жыл басынан бері Қазақстанда 132 ықтимал қайтыс болғаннан кейінгі донор анықталды. Осы кезеңде дәрігерлер барлығы 205 трансплантация жасады. Бөлек атап өтуге тұрарлық жайт — мультиорганды донорлықтың 13 жағдайы. Қаза тапқан адамдардың органдары 42 өмірді сақтап қалды: хирургтар 14 бүйрек, 11 жүрек, тоғыз рет бауыр, төрт өкпе және төрт қасаң қабықты трансплантациялады.
«Курсив» бұған дейін астанада бір донордың ұзақ уақыт кезекте тұрған үш қазақстандыққа өмір сыйлағанын жазған. Бір донорлық процесс аясында үш науқасқа трансплантациялау үшін жүрек, өкпе және бауыр алынды.