Шымкентте әлеуметтік желілердегі «оңай табыс» жарнамасына сеніп қалған кәмелетке толмаған жасөспірім психотроптық заттарды сату айыбымен сот алдына келіп, 5 жылға бас бостандығынан айырылды, деп хабарлайды infohub.kz сайты.
Қалалық прокуратураның ресми сайтында мәлім болғандай, 2026 жылғы 27 тамызда Шымкент қаласының кәмелетке толмағандар істері жөніндегі мамандандырылған ауданаралық соты психотроптық заттарды сатумен айналысқан кәмелетке толмаған жасөспірімге қатысты үкім шығарды.
«Жасөспірімге психотроптық заттарды көрсетілген жерлерге орналастырғаны үшін күніне 30-40 мың теңге табыс уәде етілген. Кейін ол психотроптық заттарды 51 500 теңгеге сатты», — деді қадағалау органында.
Сот оның әрекетін Қазақстан Республикасы Қылмыстық кодексінің 297-бабының 1-бөлігі бойынша саралап, 5 жылға бас бостандығынан айыру жазасын тағайындады.
Прокуратура жастарды әлеуметтік желілердегі «жылдам әрі оңай табыс» туралы күмәнді ұсыныстарға сенбеуге шақырды.
Ведомство есірткі құралдарын заңсыз сатып алу, сақтау, тасымалдау және сату қылмыстық жауапкершілікке әкеп соғатынын еске салды.