Қытай Халық Республикасының төрағасы Си Цзиньпин үш күндік мемлекеттік сапармен Америка Құрама Штаттарына келді. Оның ұшағы 23 қыркүйекте Вашингтон маңындағы Эндрюс әуе базасына қонды. Қытай көшбасшысы мен оның жұбайы Пэн Лиюаньді ұшақ баспалдағының жанында президент Дональд Трамп пен бірінші ханым Мелания Трамп қарсы алды, деп хабарлайды infohub.kz сайты.
Кездесу үшін ұзындығы шамамен 30 метрлік қызыл кілем төселді. Екі көшбасшы қол алысып, бірнеше минут әңгімелесті. Екі елдің әнұрандары шырқалып, салтанатты зеңбірек атылды. АҚШ президенті шетел көшбасшысын Эндрюс әуе базасында соңғы 11 жылда алғаш рет қарсы алды.
Трамп пен Си келіссөздерге кіріспестен бұрын АҚШ қаржы министрі Скотт Бессент Вашингтон мен Пекин арасындағы сауда бәсеңдеуін 2027 жылдың 10 қаңтарына дейін ұзарту туралы уағдаластықты мәлімдеді. Бұған дейінгі мерзім 10 қарашада аяқталатын. Бессенттің айтуынша, бұл тараптарға кеңірек экономикалық келісімді талқылауға қосымша уақыт береді.
Пусан келісімі деп аталатын құжат Трамп пен Сидің 2025 жылдың қазанында Оңтүстік Кореядағы кездесуінен кейін жасалған болатын. Ол сауда шиеленісін төмендету шараларын, соның ішінде көтерілген кеден бажының бір бөлігін тоқтата тұруды көздейді. Бәсеңдеуді ұзарту өз алдына жаңа ауқымды сауда мәмілесін жасауды білдірмейді.
Көшбасшылардың негізгі келіссөздері 24 қыркүйекке жоспарланған. Reuters дерегінше, тараптар сауданы, сирек кездесетін минералдарды, жасанды интеллектті және Тайваньді талқылауы мүмкін. Агенттік дереккөздері ықтимал нәтижелер қатарында жекелеген тауарларға баж салығын төмендетуді және әскери ведомстволар арасындағы диалогты кеңейтуді атайды.
Ақ үй бағдарламасына сәйкес, 24 қыркүйекте ресми қарсы алу рәсімі мен мемлекеттік кеш өтеді. Reuters дерегінше, шақырылғандар қатарында Сэм Альтман, Дженсен Хуанг және Тим Кук сияқты ірі технологиялық компаниялардың басшылары бар. 25 қыркүйекке АҚШ Ұлттық мұрағатына бару жоспарланған, содан кейін сапар аяқталады.