Сиэтлдегі азық-түлік фестивалінде болған атыстан екі адам қаза тауып, бес адам жараланды, деп хабарлайды infohub.kz сайты.
Жексенбі күні кешке Ғарыш инесі маңындағы Сиэтл орталығында өтіп жатқан «Бит оф Сиэтл» азық-түлік фестивалінде атыс болды. Қалалық өрт сөндіру қызметі өкілінің айтуынша, оқиға салдарынан екі адам қаза тауып, бес адам жараланды. Атыстан кейін полиция тұрғындарды бұл аймақтан аулақ болуға шақырды.
Харборвью медициналық орталығының өкілі Сьюзан Греггтің мәліметінше, оларға төрт зардап шегуші жеткізілген, соның ішінде бір сәби, 23 жастағы ер адам және екі әйел бар. Бір науқастың жағдайы ауыр деп бағаланып отыр.
Оқиға куәгері Эстан Уаконабоның айтуынша, ол қыз-досымен бірге фестивальде фотосуретке кезекте тұрғанда, артынан біреу итеріп жіберген. Содан кейін ол адамдардың үрейленіп қашқанын көрген. «Адамдар тығылып жатыр, итерісіп жатыр, жерге құлап жатыр, балалар арбалары да құлады», – дейді Уаконабо. Ол дыбыстарды естігенде атыс екенін түсінгенін айтады. Қыз-досын қауіпсіз жерге апарып, оқиға орнына қайта оралғанда, бірнеше жәбірленушіні жерде жатқан күйі көрген.
Айта кетейік, жыл сайын өтетін бұл фестиваль 1982 жылы басталған және үш күн ішінде шамамен 350 000 адамды тартады.