Чехиялық Skoda маркасы Karoq кроссоверінің екінші буынын дайындап жатыр. Жуырда ғана компания бұл модельден бас тартып, орнына Elroq электромобилін шығаруды жоспарлаған еді. Енді ойынан қайтқан өндіруші жаңа кроссоверге алғаш рет қуаты 100 км-ден асатын электр жүрісі бар зарядталатын гибрид қондырғысын ұсынуы мүмкін, деп хабарлайды infohub.kz сайты.
Алғашқы Karoq 2017 жылы пайда болған. Алайда электрлендіру жоспарларына байланысты компания оған тікелей мұрагер жасауды көздеген жоқ. Модель қатарындағы орнын электрлік Elroq алуы тиіс болатын.
Дегенмен қазір Skoda басшысы Клаус Целлмер екінші буын Karoq-қа рұқсат берді. Жаңа модель Volkswagen Group MQB платформасын сақтайды. Премьерасы 2027 немесе 2028 жылы күтілуде.
«Бұл қазіргі Elroq-тан айтарлықтай өзгешелік болады, бірақ біз сол баға сегментіне дөп түсуге тырысамыз. Сонда сіз ақшаңызға көбірек құндылық аласыз», – деді Целлмер.
Қазір Karoq ішкі жану қозғалтқышымен және жұмсақ гибрид қондырғыларымен ұсынылады. Ал келесі буын, Skoda басшысының сөзінше, толыққанды зарядталатын гибридке (PHEV) ие болуы мүмкін.
Целлмердің айтуынша, жаңа Karoq-тың қуат қондырғылары жеті орынды Kodiaq-та қолданылып жүргендерге жақын болады. Сондықтан кроссоверге электр жүрісі 100 км-ден асатын зарядталатын гибрид қондырғысы берілуі ықтимал.
Сонымен қатар жаңа Karoq-тың пайда болуы тек гибридтерге сұраныспен түсіндірілмейді. Skoda Elroq Karoq-тың орнын толық жабады деп есептеген, алайда олай болмады. Оның үстіне Elroq өте табысты болып шықты – Целлмердің сөзінше, ол Еуропада сатылымы бойынша екінші электромобиль.
Бұл жаңалық Қазақстан нарығы үшін де қызықты. Қазір Skoda Karoq ішкі жану қозғалтқышымен елімізде ресми түрде 14 млн теңгеден бастап сатылады. Егер екінші буын зарядталатын гибридке ие болса, әдеттегі шағын кроссовер форматына электр қуатымен жүру мүмкіндігі қосылады.
Болашақ Karoq-тың бағасы мен комплектациялары туралы әзірге айту ерте. Skoda тек модельді дайындап жатыр, нақты сипаттамаларын өндіруші әлі жариялаған жоқ.
Бұған дейін Курсив Авто Skoda Superb универсалы Қазақстанда сатылымға шығуы мүмкін екенін жазған болатын.