Бірқатар арзан смартфон өндірушісі жаңа құрылғыларға сатып алушыларды ескертпей, бұрын қолданылған жедел жад микросхемаларын орнатты деп күдікке ілінді. Мұндай тұжырым ChannelNews басылымының жарияланымынан шығады, деп хабарлайды infohub.kz сайты.
Айтуларынша, бұған жасанды интеллект дамуы аясында құрамдас бөлшектердің күрт қымбаттауы себеп болған. Samsung Electronics пен SK hynix сияқты ірі жеткізушілер өндірістік қуаттарын серверлер мен дата-орталықтарға арналған қымбат чиптерге бағыттап қойған. Counterpoint Research талдау компаниясының дерегінше, ультраарзан смартфондардың өзіндік құнындағы жадқа жұмсалатын шығын үлесі 2025 жылдың үшінші тоқсанындағы 20%-дан 54%-ға өскен.
Арзан 4G-смартфондардың бағасын ұстап тұру үшін жекелеген брендтер көлеңкелі нарықтан 4 гигабайттық бұрын қолданылған жедел жад модульдерін сатып алады. Мамандар микросхемаларды ескі платалардан қыздырып алып, тазалайды да, оған жаңа дәнекер шарларын жағады — бұл процесті реболлинг деп атайды. TrendForce зерттеу фирмасының болжамынша, 2027 жылға қарай мұндай қалпына келтірілген бөлшектер телефондардың жаңа модельдеріндегі жад нарығының 9%-ына дейін алуы мүмкін.
Шалаөткізгіштер сенімділігі жөніндегі инженерлер чиптерді ескі платалардан алу кезіндегі қызу микрожарықтар тудырып, қатып қалуға, істен шығуға немесе деректердің жоғалуына әкелуі мүмкін екенін ескертеді. Бұл тәжірибені қолданатын нақты брендтер әзірге аталмаған, ал ірі әлемдік өндірушілердің қолданылған бөлшектерді пайдаланғанына дәлел жоқ.