Пәкістанның солтүстік-батысындағы қауіпсіздік бекетіне көлік бомбасы шабуыл жасалды. Салдарынан кемінде 27 адам қаза тапты. Қаза болғандардың арасында 12 әскери, екі полицей, бір орман қызметкері және 12 шабуылшы бар. Оның төртеуі жанкешті болған. Бұл туралы Пәкістан әскері мәлімдеді, деп хабарлайды infohub.kz сайты.
Шабуыл түнде Ауғанстан шекарасына жақын Танк ауданында болды. Шабуылшылар бекетке күшпен кіруге тырысып, жарылғыш зат тиелген көлікті қоршау қабырғасына соққан. Пәкістандық Талибан төрт жанкештінің шабуылға қатысқанын мәлімдеді. Қазір аймақта іздестіру жұмыстары жүріп жатыр.
Бұл шабуыл – солтүстік-батыс Пәкістанда қауіпсіздік күштері мен лауазымды тұлғаларға қарсы көптен бері жалғасып келе жатқан шабуылдардың соңғысы. Көршілес Ауғанстанда Талибан билікке қайта келгеннен бері зорлық-зомбылық күшейді. Себебі көптеген қарулы топтар сонда пана тапқан. Хайбер-Пахтунхва провинциясында шабуылдар күрт өсті. Көрші Банну ауданында өткен аптада полицияға қарсы шабуылдар мен жанкештілер жарылыстарының көбейгені хабарланды.
Қауіпсіздік және зерттеу орталығының мәліметінше, 2024 жылы Пәкістанда 1620 адам қаза тапса, 2025 жылы бұл көрсеткіш 2331 болған. Пәкістан бейбітшілік зерттеулері институты ел бойынша шабуылдар саны 34 пайызға өскенін хабарлады.
Пәкістан үкіметі Ауғанстанды қарулы топтарға пана берді деп айыптайды. Ауғанстандағы Талибан үкіметі бұл айыптарды жоққа шығарып, шабуылдар Пәкістанның ішкі мәселесі екенін айтады. Келіспеушілік әскери қақтығысқа ұласып, Пәкістан Ауғанстан аумағына бірнеше рет әуе соққысын жасады, ал Ауғанстан жауап берді. Біріккен Ұлттар Ұйымы осы оқиғалардан жүздеген ауған бейбіт тұрғынының қаза тапқанын тіркеді.