12 қазан күні кешке Солтүстік Қазақстан облысының тұрғындары ерекше құбылысқа куә болды — Петропавл үстінен аспанда жарқыраған жарық шамдар ұшып өтті. Куәгерлер оқиғаны телефонға түсіріп, әлеуметтік желілерде жариялады, бейнені жергілікті пабликтердің бірінде бөлісті, деп хабарлайды infohub.kz сайты.
Пікірлерде қолданушылар түрлі болжам айтты: біреулер дрон десе, енді біреулер ұшақ, метеорит, зымыран немесе тіпті ұшқыш нысан деп болжады. Тағы бір бейнені қазақстандық әйел кешкі жүгіру кезінде түсіріп алған.
Kazinform агенттігі бұл нысанның немесе құбылыстың табиғатын М. Қозыбаев атындағы Солтүстік Қазақстан университетінің профессоры, белгілі астрофизик Андрей Солодовниктен сұрап білмек болды. Оның пікірінше, қазақстандықтар байқаған шамдар орбитаға шыққан ғарыш техникасы бөліктерінің атмосферада жануының нәтижесі болуы мүмкін.
«Бұл болид болуы мүмкін, бірақ оның жылдамдығы бірнеше есе төмен. Сондай-ақ бұл зымыран-тасығыштың соңғы сатысының бұзылуы немесе орбитадан шыққан спутник болуы мүмкін. Мұндай бейнелер бұған дейін де әлемнің басқа аймақтарында түсірілген. Қазір бізде спутниктер саны мыңнан асады. Сондықтан бұл жұмысын тоқтатқан аппараттардың бірі болуы мүмкін», — деді Андрей Солодовник.
Профессор биылғы қазанда жарқыраған болидтер сирек емес екенін нақтылады, өйткені осы кезеңде Жер бір мезгілде бірнеше ірі метеорит ағындарының орбитасын кесіп өтеді. Мұның негізгі себебі — кометалардан бөлінген ұсақ бөлшектердің Жер атмосферасына жоғары жылдамдықпен кіруі.
Андрей Солодовник метеорит жерге құлаған кезде адамдар күн күркірегенге ұқсас дыбыс еститінін түсіндірді. Ал егер нысан аспанда жарқырап қана ұшып өтсе, онда ол болид болуы мүмкін. Оның айтуынша, мұндай құбылыс қауіп төндірмейді, өйткені нысан атмосферада жанып, жерге жетпей шаңға айналады.