Жамбыл облысында сот медиациясы 37 жыл бұрын туындаған асыраушысынан айырылу бойынша жәрдемақы тағайындау туралы дауды реттеуге көмектесті, деп хабарлайды infohub.kz сайты.
Жамбыл облысы соттарының ресми Telegram-арнасында хабарланғандай, Байзақ аудандық соты әйелдің Халықты әлеуметтік қорғау саласындағы реттеу және бақылау комитетінің департаментіне қойған талабы бойынша әкімшілік істі қарады. Талапкердің анасы 1989 жылы қайтыс болған, ал талапкердің өзі бала кезінен екінші топтағы мүгедек. Анасы қайтыс болғанға дейін ол өз бетінше табыс таба алмағандықтан, анасының асырауында болған.
Әйел департаментке асыраушысынан айырылу бойынша жәрдемақы тағайындау туралы өтінішпен жүгінген, алайда оның өтініші қанағаттандырылмаған. Жауапкер алдымен анасының асырауында болғанын анықтау қажет екенін түсіндірген. Бас тартумен келіспеген талапкер сотқа талап арыз берген.
Сот жүргізген татуласу рәсімдері барысында тараптар дауды медиация тәртібімен реттеу туралы келісімге қол жеткізді. Келісім шарттары бойынша талапкер жәрдемақы тағайындау туралы өтінішпен департаментке қайта жүгінуге міндеттенді, ал жауапкер өтінішті тиісті түрде қарап, ол бойынша оңтайлы шешім қабылдауға міндеттенді. Келісімге қол жеткізуге байланысты талапкер қойылған талаптардан бас тартты, ал сот медиация шарттарын бекітіп, әкімшілік талап арызды қайтарды. Сонымен қатар, талапкерге мемлекеттік баж қайтарылды. Ұйғарым заңды күшіне енді.