Қытайдың Гуандун провинциясында биылғы ең күшті Noul тайфуны салдарынан 700 мыңнан астам адам эвакуацияланды. Стихия дауылды жел тудырып, ауқымды су тасқыны қаупін төндірді. Тайфун іргелес Гонконгқа да әсер етті. Бұл туралы Reuters агенттігі хабарлады, деп жазады infohub.kz.
Маусымдағы 12-ші тропиктік циклон және осы айда Қытайға жеткен үшінші дауыл болған Noul жергілікті уақыт бойынша сағат 03:50 шамасында Хуэйдун ауданының жағалауына шықты. Бірнеше провинцияда кенеттен су тасқыны қаупіне байланысты ең жоғары деңгейдегі ескерту жарияланды.
Қытай ұлттық метеорологиялық орталығының болжамынша, күшті және кей жерлерде нөсерлі жаңбыр елдің оңтүстігінің басым бөлігін дүйсенбі таңына дейін жауады, ал кейбір аудандарда жауын-шашын сейсенбіге дейін сақталады. Әсіресе қатты нөсер Фуцзянь провинциясында күтіледі; тайфун материк ішіне жылжыған сайын жел мен жаңбыр Цзянси және Хунань провинцияларына да әсер етеді. Билік жергілікті әкімшіліктерді қауіпті аймақтар — таулы жерлер, өзен аңғарлары, құрылыс алаңдары мен көпірлердегі бақылауды күшейтуге шақырды, өйткені бұл жерлерде су тасқыны қаупі өте жоғары.
Гонконг обсерваториясының дерегінше, тайфун біртіндеп әлсіреп келеді, бірақ қала әлі де күшті оңтүстік-батыс желінің әсерін сезінуде. Түнде циклон Гонконгтан 80 шақырымнан аз қашықтықта өтті. Түстен кейін дауылды ескерту деңгейі сегізден үшіншіге төмендетілді, ал Гонконг халықаралық әуежайы ұшуларды біртіндеп қайта бастағанын хабарлады. Бұған дейін әуежайдың жұмысы 12 сағаттан астам уақыт бойы тоқтап қалған еді.
Бұған дейін «Курсив» басылымы Жапонияға соққан күшті «Бави» тайфуны туралы хабарлаған болатын.