Таразда жаяу жүргіншілер жолында әйелді қағып кеткен Lexus көлігінің жүргізушісі рақымшылыққа ілігіп, жазадан құтылуы мүмкін. Зардап шеккен әйел ауыр жарақат алып, қозғалуға шамасы жоқ, деп хабарлайды infohub.kz сайты.

Маникюр шеберінің өмірін «дейін» және «кейін» деп екіге бөлген қорқынышты апат жаз ортасында болды. 40 жастағы Ульяна Лагашкина жұмысқа бара жатқанда, оны Lexus көлігі қағып кетті. Соққыдан әйел есінен танып, бір аптадан астам реанимацияда жатты, содан кейін тағы екі ай қарапайым палатада емделді. Қазір Ульяна әрең қозғалады, үнемі жылайды. Ол отбасының жалғыз асыраушысы еді, күйеуі де мүгедек, балалары әлі оқиды.

Әйелдің айтуынша, сол қайғылы күні рөлде отырған әйелдің жүргізуші куәлігі мүлде болмаған. Күйеуінің көлігін мініп, газ бен тежегішті шатастырып алыпты.

«Ол айтты... Не айтты дейсіз. Тек кешірім сұрады, болды. Мен оған: «Мені аяққа тұрғызыңыз. Болды, басқа ештеңе қаламаймын. Аяққа тұрған күні бәрін ұмытамын», – дедім», – дейді әйел.

Кінәлі әйел алғашында шынымен көмектесті. Зардап шеккенге арнайы төсек сатып әперді, тіпті бірнеше процедураны төледі. Бірақ кейін, Ульянаның туыстарының айтуынша, әйел жоғалып кетті. Ал отбасының адвокатына рақымшылық туралы хабарлады.

«Біз бәрібір істі жасырғысы келді немесе осы кінәліге рақымшылық қолданғысы келді деп ойлаймыз, сондықтан осылай болды. Рақымшылық қолданылуы мүмкін емес, өйткені санат сәйкес келмейді. Өйткені бізде денсаулыққа ауыр зиян келтірілген. Бірақ мен ештеңеге таңғалмаймын», – дейді адвокат Лола Врублевская.

Адвокаттың айтуынша, іс басынан бастап оғаш жүргізілген. Ульянаны зардап шегуші деп танымаған. Алғашқы жауабын төрт айдан кейін ғана алған. Ал тергеушілер тіпті жол апаты болған жерден бейнежазбаны да алып қоймаған.

Полиция бұл ақпаратты растамайды. Бірақ жоққа да шығармайды.

«Осы факті бойынша Қазақстан Республикасы Қылмыстық кодексінің 345-бабының 2-бөлігі бойынша сотқа дейінгі тергеу басталды. Көлік арнайы айыппұл тұрағына қойылды. Қазіргі таңда қажетті тергеу әрекеттері жүргізілуде», – деп атап өтті Жамбыл облысы ПД баспасөз қызметінің жетекшісі Гүлсара Мұхтарқұлова.