Қырғызстан ҰҚМК-нің бұрынғы басшысы Камчыбек Ташиев «75-тің хаты» деп аталатын мемлекеттік төңкеріс әрекеті бойынша үкімге шағымданды. Бұл туралы infohub.kz хабарлайды.
Басылымның хабарлауынша, Ташиевтің адвокаты Икрамидин Айткулов оның «75-тің хаты» ісі бойынша үкімге шағымданғанын мәлімдеді. Апелляция қазірдің өзінде Бішкек қалалық сотына жолданған. Оны қарау екі айға жуық уақыт алады.
Бұған дейін Бішкек соты Камчыбек Ташиевті «75-тің хаты» ісі бойынша кінәлі деп таныған еді. Оған мүлкін тәркілеп, төрт жыл бас бостандығынан айыру жазасы кесілген, алайда үш жылдық пробациялық бақылау белгіленіп, жазаны өтеуден босатылған.
Бұл іс бұрынғы жоғары лауазымды шенеуніктер, депутаттар және қоғам қайраткерлері тобының өтінішіне байланысты. Олар Садыр Жапаровтан елде мерзімінен бұрын президент сайлауын өткізуді сұраған. Осы іс бойынша бұрынғы бас прокурор Курманкул Зулушев, Жоғорку Кенештің бұрынғы спикері Нурланбек Тургунбек уулу және хатқа қол қойған бес адам да сотталған.
Еске сала кетейік, кеше Қырғызстанда келесі президент сайлауының күні жарияланды. Олар 2027 жылғы 27 қаңтарда өтеді. Тиісті жарлыққа ел Президенті Садыр Жапаров қол қойды.