Алматыда «Таза Қазақстан» республикалық бағдарламасы аясында оқушылар мен олардың отбасыларында экологиялық әдеттерді қалыптастыруға бағытталған GREEN UP экологиялық жобасы старт алды. Жобаның тұсаукесері 31 тамызда қалалық №224 мектепте өтті, деп хабарлайды infohub.kz сайты.
Жоба ECO Network қатысуымен, қалалық экология және қоршаған орта басқармасы мен Eco Almaty қолдауымен жүзеге асырылуда. Алғашқы пилоттық іске қосу Бостандық ауданында өтуде. Green APP Almaty бағдарламасында аудандағы балабақшаларды, мектептер мен колледждерді біріктіру жоспарлануда. Бастаманың негізі Марков көшесі, 44 мекенжайындағы және Satbayev University-дегі экохабтар, сондай-ақ econetwork.me цифрлық платформасы болды.
Қатысушылар үйде қайта өңделетін шикізатты жинап, оны экохабтарға тапсыра алады. Нәтижелер мобильді қосымшада тіркеліп, білім беру мекемелерінің жалпы рейтингінде ескеріледі. Экологиялық акциялар мен волонтерлік іс-шараларға қатысқаны үшін де балл жинауға болады.
№224 мектеп директоры Райза Ахметова экологиялық әдеттерді ерте жастан қалыптастырудың маңыздылығын атап өтті. «Біздің мақсатымыз — оқушыларда экологиялық мәдениетті қалыптастырып, қоршаған ортаға жауапкершілікпен қарауды күнделікті әдетке айналдыру. Бала табиғатты қорғау қажеттігін біліп қана қоймай, өз іс-әрекетімен оны сақтауға нақты үлес қоса алатынын түсінуі маңызды», — деді Райза Ахметова.
Тұсаукесер барысында оқушыларға қалдықтарды қалай дұрыс сұрыптау керектігі және қандай материалдар қайта өңдеуге қабылданатыны көрсетілді. Оқушылар макулатура мен пластик қалдықтарды әкеліп, қайта өңдеуге тапсырды.
Жоба авторы Евгений Мухамеджанов экологиялық әдеттер тәжірибе мен бүкіл отбасының қатысуы арқылы тиімді қалыптасатынын атап өтті. «Экологиялық мәдениет адамның күн сайын орындайтын қарапайым әрекеттерден басталады. Егер бала үйде қалдықтарды сұрыптап, оларды қайта өңдеуге әкелсе, біртіндеп бұл процеске бүкіл отбасы тартылады. Біздің міндетіміз — экологиялық мінез-құлықты түсінікті, қолжетімді және қызықты ету», — деп түсіндірді Евгений Мухамеджанов.
Болашақта қатысушылар экологиялық клубтар құра алады, өз бастамаларын ұсына алады және қалалық табиғат қорғау акцияларына қатыса алады. Мектеп оқушылары, колледж студенттері, ата-аналар және білім беру мекемелерінің қызметкерлері үшін волонтерлік бағдарламалар да қарастырылған.
Жоба ынталандыру жүйесін қамтиды: қатысушылар мен білім беру мекемелері белсенділігі мен белгілі бір қайта өңделетін шикізат түрлерін жинағаны үшін жүлделер ала алады. Болашақта модельді Алматының басқа аудандарына тарату жоспарлануда. GREEN UP экологиялық ағартуды, цифрлық құралдарды және практикалық іс-әрекеттерді біріктіріп, қалдықтарға жауапкершілікпен қарауды күнделікті өмірдің бір бөлігіне айналдырады.