Қазақстан Президенті Қасым-Жомарт Тоқаев XVIII БРИКС саммиті аясында Абу-Даби мұрагер ханзадасы шейх Халед бен Мұхаммед бен Заид әл-Нахаянмен кездесті. Бұл туралы мемлекет басшысының баспасөз қызметі хабарлады, деп жазады infohub.kz.
Қасым-Жомарт Тоқаев шейх Халед бен Мұхаммед бен Заид әл-Нахаянның Астанаға сапарының тарихи маңызын атап өтті: оның аясында екіжақты қатынастарды дамытуға қуатты серпін беретін ауқымды құжаттар пакетіне қол қойылды.
«Біздің ынтымақтастығымыз шынымен де көп қырлы сипатта және кең ауқымды бағыттарды қамтиды. Біз бірлескен жұмысты жалғастыру және одан әрі дамыту үшін бұдан былай да барлық күш-жігерді жұмсаймыз», – деді Қазақстан Президенті.
Тараптар энергетика, көлік және логистика, ақпараттық технологиялар және ауыл шаруашылығы салаларында табысты жүзеге асырылып жатқан бірқатар ірі инвестициялық жобалардың орындалу барысын талқылады. Бұл жобалар экономикалық өзара іс-қимылды дамытуға және екіжақты сауда көлемін ұлғайтуға ықпал ететіні атап өтілді.
Кездесу қорытындысы бойынша екі ел арасындағы тығыз ынтымақтастықты нығайтуға өзара бейілділік расталды.
Қасым-Жомарт Тоқаев Біріккен Араб Әмірліктерінің Президенті шейх Мұхаммед бен Заид әл-Нахаянға ең жақсы тілектерін жеткізіп, оның Қазақстанға сапарын асыға күтетінін айтты.
Бұған дейін «Курсив» Тоқаевтың XVIII БРИКС саммитіне қатысу үшін Нью-Делиге келгенін жазған болатын.