Қазақстан Президенті Қасым-Жомарт Тоқаевтың Германияға ресми сапары елдің экономикалық қауымдастықтары мен қаржы институттарының басшыларымен кездесуден басталды, деп хабарлайды infohub.kz сайты.
Президенттің баспасөз қызметі мәлімдегендей, Қасым-Жомарт Тоқаев кездесуге қатысушылармен германдық қаржыны, сараптамалық тәжірибені және тәуекелдерді басқару құралдарын Қазақстанның ресурстары мен көлік әлеуетімен біріктіру перспективаларын талқылады.
Мемлекет басшысы еліміздің Германияның Орталық Азиядағы және Еуразия кеңістігіндегі сенімді серіктесі болуға ұмтылатынын мәлімдеді.
«Германия менің халқымның терең құрметіне бөленгенін және Қазақстанда өте жоғары беделге ие екенін атап өткім келеді. Сіздердің банк секторыңыздың тәртібі, инженерлік шешімдердің жоғары сапасы, сондай-ақ шағын және орта бизнестің (Mittelstand) тұрақтылығы — біз жаңғырту мен технологиялық трансформация барысында экономикамызға енгізуге ұмтылатын дәл сол қасиеттер. Германия Федеративтік Республикасы — Еуропадағы негізгі серіктестеріміздің бірі. Қазақ-герман ынтымақтастығы Қазақстанның ең ірі сауда және инвестициялық серіктесі — Еуропалық одақпен өзара іс-қимылының ажырамас бөлігі. Біз бірге үлкен жолдан өттік, бірақ экономикалық серіктестігіміздің әлеуеті әлі де толық пайдаланылған жоқ. Қазақстан оны сапалы жаңа деңгейге шығаруға дайын», — деді президент.
Осылайша, Қасым-Жомарт Тоқаев қазақстан-герман инвестициялық-қаржы платформасын құруды ұсынды.
«Мұндай платформа германдық және еуропалық капиталды қазақстандық қаржыландырумен, кепілдіктермен және тәуекелдерді бөлу тетіктерімен біріктіруге мүмкіндік береді, ал «Бәйтерек» холдингі жобаларды құрылымдауды қамтамасыз етеді. Біз елімізде жұмыс істеп жатқан халықаралық қаржы ұйымдарымен қатар германдық экспорттық кредиттеу және инвестицияларды сақтандыру институттарының қатысуын құптаймыз. Осы тұрғыда Қазақстанда қызметін жүзеге асырып жатқан Euler Hermes компаниясымен ынтымақтастыққа беретін маңызымызды ерекше атап өткен жөн», — деп түсіндірді Қазақстан президенті.
Сөзінде тағы бір басымдық ретінде цифрлық инновациялар мен жасанды интеллект саласындағы қазақ-герман серіктестігін құру аталды.
«Біз германдық компанияларды деректерді өңдеу орталықтарына арналған технологиялар, энергия тиімділігі, бұлттық инфрақұрылым және киберқауіпсіздік сияқты салаларда өз әлеуетін пайдалануға шақырамыз. Тағы бір перспективалы бағыт — финтех. Қазақстанның цифрлық қаржы экожүйесінің жоғары даму деңгейі ішкі нарықта озық төлем шешімдері мен токенизация технологияларын құруға, кейіннен оларды бүкіл аймаққа кеңейтуге мүмкіндік береді», — деді мемлекет басшысы.
Қасым-Жомарт Тоқаевтың пікірінше, ынтымақтастықтың келесі бағыты — неміс қаржы секторының Қазақстан экономикасына кеңірек қатысуы үшін «қақпа» болуға тиіс Alatau City дамыту.
«Бұл жоба — Орталық Азиядағы цифрлық дәуірдің барлық талаптарын ескере отырып жобаланған алғашқы «ақылды қала». Ол неміс институционалдық капиталы мен Қазақстанның инвестициялық мүмкіндіктері арасындағы практикалық байланыстырушы буынға айнала алады. Alatau City бүкіл Еуразияда таланттар, технологиялар мен бизнестің жаңа тартылыс орталығына айналатынына сенімдімін», — деп есептейді президент.
Қорытындылай келе, Қасым-Жомарт Тоқаев Қазақстан мен Германия саяси диалогтың жоғары деңгейіне сүйене отырып, тығыз қаржылық, технологиялық және инвестициялық серіктестік құру үшін барлық қажетті мүмкіндіктерге ие екенін атап өтті. Басты мақсат — капитал ағынын жай ғана ұлғайту емес, бірлесіп жаңа салалар мен ұзақ мерзімді өсу нүктелерін құру.