Alatau City-де Кореяның озық технологиялар университетінің (KAIST) филиалы ашылады. Қазақстан Президенті Қасым-Жомарт Тоқаев бұл жобаны республиканың Оңтүстік Кореямен цифрландыру және жасанды интеллект саласындағы ынтымақтастығы үшін серпінді деп бағалады, деп хабарлайды Ақорда баспасөз қызметі, infohub.kz сайтына сілтеме жасап.

Мемлекет басшысы Қазақстан мен Оңтүстік Корея цифрлық технологиялар саласында бірлескен жобаларды іске асырып жатқанын атап өтті.

«Корея Республикасы – әлемдік технологиялық жарыстың көшбасшыларының бірі. Қазақстан да цифрлық трансформацияның белсенді қатысушысына айналды. Астанада Alem.ai халықаралық орталығы ашылды, суперкомпьютерлер іске қосылды, жасанды интеллектке мамандандырылған университет жұмысын бастады. Кореямен бірқатар бірлескен бастамалар жүзеге асырылуда. Атап айтқанда, Түркістанда Woosong университеті ашылды, Қызылордада SeoulTech-пен бірлесіп Жасанды интеллект институты құрылды. Біздің әріптестігіміздің серпінді жобасы – әлемнің жетекші технологиялық университеттерінің бірі KAIST-тің (Кореяның озық технологиялар университеті) Alatau City-де филиалының ашылуы», – деді мемлекет басшысы.

Тоқаевтың айтуынша, биыл Кореяның ғылыми-техникалық ақпарат институтымен бірлесіп құрылған AI SilkNet предиктивті аналитика және форсайт орталығы да жұмысын бастады. Ол осы орталықтың аясында екі елдің ғылыми мекемелері, университеттері мен технологиялық компанияларын біріктіруді ұсынды.

Президент сондай-ақ Кореямен бірлесіп Орталық Азия елдері үшін жасанды интеллект саласындағы мамандар даярлайтын AI Talent өңірлік бағдарламасын іске қосуды маңызды деп санайды.

Президенттің айтуынша, бұл экономикалық өсу мен ғылыми прогресті ынталандыратын жаңа технологиялық кеңістік қалыптастыруға мүмкіндік береді.

Жасанды интеллект саласындағы ынтымақтастықтан бөлек, тараптар сутегі энергетикасы мен көмір генерациясын жаңғыртуды талқылады.

Бұған дейін Қазақстан Президенті Қасым-Жомарт Тоқаевтың «Орталық Азия – Корея Республикасы» саммитіне қатысқаны хабарланған. Ол жартылай өткізгіштер өндіру үшін қазақ-корей компаниясын құруды ұсынды.