Қазақстан Халық Кеңесінің алғашқы сессиясында Президент Қасым-Жомарт Тоқаев қазақ тілі мен елдегі басқа да тілдердің рөлі туралы айтып, ұлтаралық араздық қаупі туралы ескертті, деп хабарлайды infohub.kz сайты.
Мемлекет басшысы мемлекеттік тілдің жалпыұлттық бірлік пен мемлекеттілікті нығайтудың маңызды факторы екенін атап өтті. «Болжам ретінде айтылған нәрселер енді шындыққа айналып отыр. Қазақ тілі ешқандай әкімшілік, әсіресе саяси мәжбүрлеусіз-ақ, ең алдымен жастар арасында кең таралып келеді. Ол мемлекеттік тіл ретінде де, ұлттық мәдениет пен бірегейліктің символы ретінде де сұранысқа ие. Қазақ тілінің қарапайым негіздерін білмеу жалпы білімсіздіктің белгісіне айналды», — деді Президент Қасым-Жомарт Тоқаев.
Оның айтуынша, бұл — толеранттылық пен сендіру негізіндегі бірлескен жұмыстың нәтижесі. «Бірақ бұл басқа тілдерден бас тарту дегенді білдірмейді және оларды қысымға алуға құқық бермейді. Өздеріңіз білетіндей, тілдік, этникалық, конфессиялық немесе өзге де белгілер бойынша кемсітушілікке Конституцияның өзі тыйым салады. Осыған қарамастан, кәсіби арандатушылар кейде әлеуметтік желілерде және нақты өмірде ұлтаралық араздықтың отын тұтандырады. Түсіну керек: олар бір ғана мақсатқа жетуге тырысады — қоғамымызды әлсірету, Қазақстанның егемендігіне нұқсан келтіру, халқымызды бірліктен, демек, бейбіт әрі берекелі өмір сүру мүмкіндігінен айыру. Олар балаларымыз бен немерелеріміздің бақытты болашағына қол сұғуда», — деді Қасым-Жомарт Тоқаев.
Президент құқық қорғау органдары мен бүкіл қоғам қағидаттылық, қатаңдық танытып, «Заң және тәртіп» конституциялық қағидатына сай әрекет етуі керектігін атап өтті. «Тіл — бұл «Құдайдың жазғаны», белгілі бір тілге қарсы күрес жүргізу — Жаратқанға және Ол жіберген нәрселерге қарсы соғысуға тырысу деген сөз. Бұдан ақымақтықты елестету қиын. Сондықтан тіл (кез келген тіл) бірлік пен ілгерілеудің айқындаушы факторына айналуы тиіс», — деп қосты ол.
Сонымен қатар Қасым-Жомарт Тоқаев қазір түрлі ұлт өкілдерінің жастары қазақ тілі мен мәдениетін белсенді түрде насихаттай бастағанын атап өтті. «Олар — шынымен рухани бай, талантқа бай адамдар. Олар — ең жоғары қоғамдық мойындау мен қолдауға лайық нағыз достық елшілері. Мемлекет олардың алдында қарыздар болмайды, өйткені қоғамымыздың тұрақтылығы, мемлекеттің әлемдік процестердің өркениетті, табысты қатысушысы ретіндегі беделі осындай азаматтарға сүйенеді», — деп атап өтті Президент.
Ол бірнеше жыл бұрын өзінің тапсырмасымен «Ел бірлігі» арнайы ордені тағайындалғанын еске салды. «Бұл — ұлт бірлігін нығайту және қоғамдық келісімді қамтамасыз ету жолындағы жемісті еңбек үшін берілетін ерекше марапат. Конституциялық мәртебесі мен кең халықтық өкілдігіне орай дәл Қазақстан Халық Кеңесі осы жоғары марапатқа лайық кандидатураларды ұсынуы қисынды әрі әділ деп санаймын», — деді Қасым-Жомарт Тоқаев.