Қазақстан Президенті Қасым-Жомарт Тоқаев «Таза Қазақстан» республикалық акциясына қатысушыларға үндеу жасап, табиғатқа ұқыпты қарау, өзара құрмет және белгіленген ережелерді сақтау азаматтардың күнделікті өмірінің ажырамас бөлігіне айналуы тиіс екенін мәлімдеді. Бұл туралы infohub.kz сайты хабарлайды.
«Оның үстіне бұл — конституциялық міндет», — деп атап өтті Мемлекет басшысы қоршаған ортаға ұқыпты қарау жөнінде айта келіп.
Тоқаевтың айтуынша, жақында Астана мен Алматыға келген американдық конгрессмендер көшелердің тазалығы мен қала әкімдіктерінің жұмысына оң баға берген. Президент сондай-ақ шетелдік туристер Қазақстанның ірі қалаларының күтімі туралы әлеуметтік желілерде бейнежазбалар жариялап жатқанын атап өтті.
Ол абаттандырылған әрі қауіпсіз қоғамдық кеңістіктер елдің шетелдегі имиджіне әсер ететінін айтты. Сонымен қатар Тоқаев мұндай жұмыстың басты мақсаты — қазақстандықтардың өздерінің өмір сүру жағдайын жақсарту екенін атап көрсетті.
«Біз имидж үшін емес, азаматтарымыздың әлеуметтік жағдайын жақсарту үшін жұмыс істеуге міндеттіміз. Бұл — басты мақсат», — деді Президент.
Бұған дейін «Курсив» жазғандай, Тоқаев тазалықтың ұлттық стандартын әзірлеуді ұсынып, әкімдерге қалалық орта жобаларын әзірлеу кезінде тұрғындардың ұсыныстарын ескеретін астаналық Урбанистика орталығының тәжірибесін зерделеуді тапсырған болатын.