Облыстар мен республикалық маңызы бар қалалардың әкімдіктері жергілікті жолдардың сапасын арттыру жөніндегі үшжылдық жоспарларды бір апта ішінде бекітуге міндетті. Бұл шешім «Сапалы жолдар: жоспарлаудан пайдалануға дейін» атты семинар-кеңестің қорытындысы бойынша қабылданды, деп хабарлайды infohub.kz сайты.
NUR.KZ-тің Қазақстан Республикасы Көлік министрлігіне сілтеме жасап хабарлауынша, ведомство елімізде жол жабынының сапасын арттыру үшін қандай шаралар қолданылатынын айтты.
Еске салайық, қыркүйек айында Қазақстан Президенті Қасым-Жомарт Тоқаев «Таза Қазақстан» акциясына қатысушыларға ағаш отырғызғаннан кейін сөз сөйлеп, еліміздегі жолдар жағдайы туралы да айтқан болатын.
«Үкімет пен әкімдер қала ішіндегі және «елдік» жолдардың, яғни үлкенді-кішілі қалалардан тыс жатқан жолдардың сапасына ерекше назар аударуы керек. Бұл — біздің «ахиллес өкшеміз», мұны мойындау керек. Бұл мәселені ешкім шеше алмады (бұл өзі ұят) немесе шешкісі келмеді, ал бұл — саботаж. Заңның қатаңдығымен шара қолданамыз», — деген еді Тоқаев.
Кейінірек, Қазақстан Халық Кеңесінің бірінші сессиясында сөйлеген сөзінде Тоқаев жол саласындағы жағдайдың «көңіл көншітпейтінін» еске салды. Сол бойда Премьер-министр Олжас Бектенов Көлік министрлігі мен еліміздің әкімдіктеріне «жол жобаларын бақылауды күшейтуді, халықтың өтініштеріне жауап беруді және мерзімдердің бұзылуына жол бермеуді» тапсырды. Ол бұған Премьер-министрдің бірінші орынбасары Нұрлыбек Налибаев жауап беретінін атап өтті.
Көлік министрлігінің дерегінше, Нұрлыбек Налибаев Олжас Бектенов тапсырған «Сапалы жолдар: жоспарлаудан пайдалануға дейін» семинар-кеңесіне қатысты.
Налибаев орындалатын жұмыстардың сапасын бақылауды күшейту және жолдардың бұзылуына әкеп соғатын бұзушылықтарға жол бермеу қажеттігін атап өтті. Ол жергілікті атқарушы органдар нысандарды белгіленген талаптарға толық сәйкес келген жағдайда ғана қабылдауды қамтамасыз етуі керектігін атап көрсетті.
«Кепілдік мерзімі ішінде ақаулар анықталса, оларды мердігерлер өз есебінен жоюы тиіс», — деді Нұрлыбек Налибаев.
Баспасөз қызметінің ақпаратынша, негізгі тапсырмалардың бірі — облыстар мен республикалық маңызы бар қалалардың әкімдіктерінің бір апта ішінде жергілікті жолдардың сапасын арттыру жөніндегі үшжылдық жоспарларды бекітуі.
«Жоспарлар жол жұмыстарының барлық кезеңдерін қамтуы тиіс: басым учаскелерді айқындау, жобалық құжаттаманы дайындау, құрылыс пен жөндеу жүргізу, орындалған жұмыстардың сапасын бақылау, сондай-ақ жолдарды одан әрі күтіп ұстау. Семинар қорытындысы бойынша республикалық және жергілікті маңызы бар автомобиль жолдары желісінің сапасын арттыруға бағытталған нақты міндеттер айқындалды», — делінген хабарламада.