Қазақстандық XDS Astana Team командасының уругвайлық велошабандозы Гильермо Томас Сильва 26 шілде жексенбі күні Испания жолдарында қатарынан екінші жеңіске қол жеткізіп, Кастилия және Леон классикасын ұтып алды, деп хабарлайды infohub.kz.
Өткен демалыс күндері Испанияда екі классикалық бір күндік жарыс өтті: Ордисия-де-Вильяфранка классикасы (елдегі ең көне кәсіби біркүндік жарыс, 1922 жылдан бері өткізіледі) және Кастилия және Леон классикасы (бұрын көпкүндік болған; 2006 жылы көпкүндік форматта оны XDS Astana Team бас менеджері Александр Винокуров жеңген болатын). 25 шілде сенбі күні Томас Сильва ұзындығы 167 шақырым болатын сақиналы маршрутта Ордисия-де-Вильяфранка классикасы аясында жеңіске жетті, ал оның командаласы италиялық Кристиан Скарони төртінші болып мәреге келді.
Жексенбі күні қазақстандық клубтың шабандоздары Бенавенте мен Любиан қалалары арасындағы 190,6 шақырымдық қашықтықта фаворит ретінде старт алды. Томас Сильва қайтадан үздік шығып, 4 сағат 23 минут 41 секундта қашықтықты еңсеріп, Movistar командасынан испандық Роджер Адрианы финалдық спринтте жеңді (ол да сол уақытпен мәреге келді). Финалда Кристиан Скарони көмектесіп, бұл жолы жеңімпазбен бірдей уақыт көрсетіп, үздік үштікті түйіндеді.
«Астананың» тағы бір өкілі, италиялық Диего Улисси сегіз секунд кешігіп, сегізінші орын алды. Аустриялық Марко Шреттль 4 минут 29 секунд артта қалып, 53-ші болып мәреге келді, италиялық Давиде Тонеатти дәл сол уақытпен 54-ші орынға тұрақтады. Италиялық Симоне Занини 14 минут 53 секунд жоғалтып, 79-шы орынды иеленді. «Астананың» тағы бір италиялығы Людовико Меллано жарысты аяқтамады — барлығы стартқа шыққан 106 шабандоздың 26-сы шығып қалды.
«Бұл — менің екі күн ішіндегі екінші жеңісім, мен өте қуаныштымын, — деді Томас Сильва. — Ең алдымен бүгінгі команданың керемет жұмысын атап өткім келеді. Жігіттер зор еңбек етіп, маған, Кристиан Скарони мен Диего Улиссиге соңғы көтерілуде жеңіс үшін күресуге толық мүмкіндік қалдырды. Біз өз карталарымызды тамаша ойнадық, және бүкіл команданың тамаша жұмысын жеңіспен, сондай-ақ Скаронидің үшінші орнымен аяқтағаныма өте қуаныштымын. Біз бірге өнер көрсеткенде өзімізді керемет сезінеміз, және сол бағытта жалғастыра береміз деп сенемін», — деп түйіндеді ол.