АҚШ президенті Дональд Трамп ұшқышсыз ұшатын аппараттар мен олардың қосалқы бөлшектерін импорттауға 100%-ға дейін баж салу туралы жарлыққа қол қойды, деп хабарлайды infohub.kz сайты.
Ақ үйдің мәлімдеуінше, жарлық дрондар мен олардың компоненттерін импорттаудан туындайтын ұлттық қауіпсіздік қатерін жоюға, сондай-ақ американдық ұшқышсыз жүйелер өнеркәсібі мен жеткізу тізбегін нығайтуға бағытталған.
Құжатқа сәйкес, АҚШ ұлттық қауіпсіздігі үшін маңызды болып саналатын ұшқышсыз ұшақтарға 100 пайыздық баж салынады. Оларға ұшу массасы 25 кг-нан асатын және жылу бейнелеу функциясымен жабдықталған дрондар жатады.
Белгілі бір қауіп төндірмейтін, кішірек өлшемдегі ұшқышсыз ұшақтарға 25 пайыздық баж енгізіледі.
Сонымен қатар, жарлық Еуропалық Одақ, Жапония, Лихтенштейн, Оңтүстік Корея, Швейцария және Тайваньнан әкелінетін ұшқышсыз ұшақтар мен қосалқы бөлшектерге 15 пайыздық, ал Ұлыбританиядан әкелінетін дрондарға 10 пайыздық баж белгілейді, егер барлық жабдық, бағдарламалық қамтамасыз ету және технологиялар осы елдерде немесе АҚШ-та өндірілген болса.
Тарифтер жарлыққа қол қойылғаннан кейін 21 күн өткен соң күшіне енеді. Ерекше сезімтал болып табылмайтын ұшқышсыз ұшақтардың компоненттеріне тарифтер 180 күннен кейін қолданыла бастайды.