АҚШ президенті Дональд Трамп Иранмен келіссөздерде прогреске қол жеткізілген-жетпегені алдағы бір-екі күнде белгілі болатынын мәлімдеді, деп хабарлайды infohub.kz сайты.
Times of India басылымының хабарлауынша, журналистерге сөйлеген Трамп Иранмен келіссөздер «өте жақсы өтіп жатқанын» атап өтті. Ол сондай-ақ серпіліс бүгін немесе ертең болуы мүмкін екенін жеткізді. «Біз 48 сағат ішінде білеміз», — деді американдық көшбасшы.
Бұл мәлімдеме Трамптың Fox News арнасына екі тараптың күні бойы созылған келіссөздер жүргізгенін айтқанынан кейін жасалды. АҚШ президенті талқылау барысын оң бағалап, егер келісімге қол жеткізілмесе, Иранды «өте күшті соққы» күтуі мүмкін екенін ескертті.
Сұхбатта Трамп келіссөздерді Ормуз бұғазының жұмысын қалпына келтірумен тікелей байланыстырды. «Бұғаз жақын арада ашылады, әйтпесе олар қатты зардап шегеді, содан кейін бұғаз ашылады», — деді Ақ үйдің басшысы.
Еске салайық, бұған дейін Дональд Трамп Иранмен қазіргі келіссөздер олар үшін келісімге қол қоюдың «соңғы мүмкіндігі» екенін мәлімдеген болатын. Сондай-ақ АҚШ президенті Иранның ешқашан ядролық қаруға ие болмайтынын айтып, егер Ормуз бұғазы ашылмаса, жаңа соққылар жасайтынын ескертті.
Оған дейін Трамп Иранға шабуылды тоқтатып, Вашингтон мен Тегеран арасындағы келіссөздерді жариялаған еді. Ол Таяу Шығыс елдерінің өтініші бойынша Иранға соққыларды тоқтату туралы бұйрық бергенін және Ормузға қатысты жаңа келісімнің мүмкіндігін айтқан.