АҚШ президенті Дональд Трамп Иранның азаматтық инфрақұрылымына соққы беретінін ескертті. Егер Теһран күштері Ормуз бұғазындағы кемелерге оқ жаудырса, әскерилер көпірлер мен электр станцияларын бомбалайды, деп хабарлайды infohub.kz сайты.
Сәрсенбі күні жасалған бұл ескерту іс жүзінде асырылса, қазірдің өзінде аймаққа жайылған қақтығыстың одан әрі ушығуына әкеледі. Трамп әлеуметтік желідегі жазбасында: «Бұдан былай Иран Ислам Республикасы Ормуз бұғазындағы кемеге зымыран, ракета, ұшқышсыз ұшақ немесе кез келген басқа құрылғымен оқ атқан сайын, Америка Құрама Штаттары астана Теһрандағы немесе оның маңындағы БІР КӨПІР НЕМЕСЕ ЭЛЕКТР СТАНЦИЯСЫН бомбалап, жояды», – деді.
Бұған дейін де Трамп Иранның көпірлері мен электр станцияларын бомбалайтынын, тіпті елдің өркениетін жою қаупін айтқан еді. Алайда сәрсенбідегі мәлімдеме бұрынғыларға қарағанда нақтырақ. Иранның жартылай ресми «Тасним» агенттігі ирандық әскери дереккөзге сілтеме жасап, егер елдің инфрақұрылымына шабуыл жасалса, Теһранның дәл осындай жауап қайтаратынын хабарлады. Дереккөз: «Егер америкалықтар Ирандағы көпір немесе электр станциясын нысанаға алса, Иран аймақтағы инфрақұрылымдарға, соның ішінде АҚШ мүддесі бар энергетикалық нысандарға соққы береді», – деп мәлімдеген.
АҚШ пен Иран арасындағы шабуылдар соңғы 12 күн бойы жалғасуда. Тараптар арасындағы соғысты тоқтатуы тиіс өзара түсіністік туралы хаттама (MoU) Ормуз бұғазының тағдырына байланысты іске аспай қалды. Иран стратегиялық су жолына өзінің егемендігін талап етіп, MoU бұғазды басқаруға өкілеттік беретінін айтады. Ал Трамп әкімшілігі Ормуздың соғысқа дейінгі халықаралық еркін өткел мәртебесіне қайтарылуын талап етуде.
Оман жағалауындағы бұғаздан Иранмен келіспей өткен кемелерге шабуыл жасалғаннан кейін қақтығыс қайта жанданды. АҚШ әскери күштері Ирандағы әскери нысандармен қатар азаматтық порттар мен көпірлерге де соққы беріп, ондаған адамды өлтірді. Теһран аймақтағы АҚШ әскерлері орналасқан базаларға зымыран мен ракета жаудырып жауап қайтарды. Ирандық шабуылдардан Иордания мен Иракта кемінде төрт әскери қызметкер қаза тауып, тағы бірнешеуі жараланды. Сейсенбі күні кешке Пентагон 28 жастағы Энжел Рамперсадтың Иорданиядағы ирандық зымыран соққысынан қаза тапқан үшінші адам екенін анықтады.
Трамп сәрсенбі күні Делавэр штатындағы Доув әуе базасында қаза тапқан әскерилердің денелерін қарсы алуға қатысады. Ол АҚШ әскерлерін өлтіргені үшін Иран «үлкен төлем төлейтінін» айтып: «Олар жойылып жатыр», – деген. Соғыстың қайта басталуы мұнай бағасының қайта көтерілуіне себеп болды. АҚШ-та бір галлон (3,4 литр) бензиннің орташа бағасы 4 доллардан асты, бұған дейін бітім кезінде ол 3,80 доллар шамасында болған еді.