Америка Құрама Штаттарының президенті Дональд Трамп өзінің Нобель бейбітшілік сыйлығына лайықты екенін тағы да айтып, алайда оған мұқтаж емес екенін атап өтті. Бұл туралы ол сыйлықты тапсыру рәсіміне қатысты журналистердің сұрағына жауап беру барысында айтты, деп хабарлайды infohub.kz сайты.
Ақ үй басшысының айтуынша, ол халықаралық тұрақтылықты сақтаудағы еңбегін мойындау үшін Нобель бейбітшілік сыйлығына мұқтаж емес.
«Мен сегіз соғысты тоқтаттым. Барлық кепілге алынғандарды қайтардым. Миллиондаған адамның өмірін сақтап қалдым. Сыйлық аламын ба, алмаймын ба, мен одан әлдеқайда көп іс тындырдым», — деді Трамп.
Ол сондай-ақ бұған дейінгі лауреат — Венесуэла оппозициясының көшбасшысы Мария Корина Мачадоның мәлімдемелерін еске салды. Трамптың айтуынша, ол «тарихта бұл сыйлыққа президент Трамптан артық лайықты ешкім жоқ» деген екен.
Сонымен қатар, Америка көшбасшысы Нобель комитеті сыйлықты оған бермесе, бұл шешім олар үшін «үлкен өкініш» болатынын атап өтті.