АҚШ президенті Дональд Трамп Онтарио көлін «Америка көлі» (Lake America) деп атау туралы жарлыққа қол қойды, деп хабарлайды infohub.kz.
Журналистердің бұл қадаммен Канадаға қандай сигнал жібергісі келетінін сұрағанына Трамп: «Ешқандай» деп жауап берді.
Онтарио көлі — Солтүстік Америкадағы бес Ұлы көлдің бірі, Канада мен АҚШ шекарасында орналасқан. Бұл Ұлы көлдердің ең шығысындағы және ауданы бойынша ең кішісі: оның ауданы шамамен 19 мың шаршы шақырым, орташа тереңдігі — 86 метр, ал ең терең жері — шамамен 244 метр. Көлмен аттас атау Канаданың орталығындағы ең тығыз қоныстанған және экономикалық дамыған провинцияға да берілген.
Шетелдік БАҚ жазғандай, көл мемлекеттік шекарамен бөлінгендіктен (солтүстік жағалауы Канадаға, ал оңтүстік жағалауы Нью-Йорк штатына тиесілі), Трамп жарлығының заңды күші тек АҚШ аумағы мен ресми құжаттарына ғана таралады.
Бұл қадам Вашингтон мен Оттава арасындағы сауда қақтығысының күрт ушығуы және баж салығы бойынша келіссөздердің сәтсіз аяқталуы аясында жасалып отыр.
Бұған дейін Трамп Truth Social әлеуметтік желісінде АҚШ канадалық Онтарио провинциясымен бизнесті белсенді жүргізуді жалғастыруды жоспарламайтынын, сондықтан атауды өзгерту керектігін мәлімдеген.
Канада премьер-министрі Марк Карни бұл шешімге қатаң қарсылық білдірді. Ол көлге атауды 400 жылдан астам уақыт бұрын гурон үндістері бергенін және канадалықтар үшін ол «мәңгі Онтарио болып қалатынын» атап өтті.
Бұған дейін Трамп тарифтік және сыртқы саясаты аясында Мексика шығанағын «Америка шығанағы» деп атауды тапсырған болатын.
Бұдан бұрын «Курсив» Трамп Канада басшылығын қатты сынға алып, канадалық саясаткерлерді «клоундар» деп атап, елге экономикалық қарым-қатынастың айтарлықтай нашарлауымен қорқытқанын жазған.