Қазақстандағы барлық тұрғын үйді ипотекаға сатып алуға болмайды: банктер жылжымайтын мүлікке қатаң талаптар қояды. Атап айтқанда, ағаш үй сатып алуға несие беруден бас тартылады, деп хабарлайды NUR.KZ (материал infohub.kz сайтында жарияланған).
Бағаның өсуіне байланысты ипотека көптеген қазақстандықтар үшін жеке тұрғын үй алудың жалғыз жолы болып отыр. Алайда несие ұйымдары пәтерлерге белгілі бір өлшемшарттар қояды, әрбір нысан мақұлданбайды. «Крыша» порталының айтуынша, банктер қабырға материалын, салынған жылын және қабат санын ескереді. Сондықтан сатып алу алдында ғимараттың салынған жылын тексерген жөн.
Әрбір банктің үйдің жасына қатысты өз талаптары бар, олар қабырға материалына байланысты: тұрғын үй неғұрлым ескі және құрылымдар неғұрлым нашар болса, бас тарту ықтималдығы соғұрлым жоғары. Мысалы, Altyn Bank үшін негізгі ең төменгі салынған жылдар: кірпіш және панельді үйлер үшін 1976 жыл, Halyk Bank үшін сәйкесінше 1960 және 1965 жылдар, Банк ЦентрКредит үшін 2000 жыл, Нурбанк үшін 1975 жыл, Отбасы банк үшін 1966 жыл. Дегенмен бұл тек бағдар: түпкілікті шешім техникалық жағдайды, өтімділікті және сараптама нәтижелерін бағалағаннан кейін қабылданады.
Көптеген банктер қаңқалы-қамысты, саман және ағаш үйлерді, сондай-ақ мансардты және жертөле қабаттарындағы пәтерлерді, тұрғын емес үй-жайлар мен бақша үйлерін сатып алуды несиелемейді. Кейбір ұйымдар, атап айтқанда Altyn Bank пен Банк ЦентрКредит, стандартты ипотека бойынша тек бес қабаттан кем емес үйлердегі пәтерлерге ғана ақша береді.
Сонымен қатар шарттар біртіндеп жеңілдеп келеді. Мәселен, Отбасы банк панельді үйлердің рұқсат етілген ең жоғары жасын өтініш беру кезінде 50 жастан 60 жасқа дейін ұлғайтты. Сонымен қатар, банк алғаш рет іргетас, коммуникациялар, әрлеу талаптарына сай келетін және материалдарға сертификаты бар, бес жылдан аспайтын уақыт бұрын салынған СИП-панельдерден жасалған жеке үйлерді кепілге қабылдай бастады.
Осылайша, бас тартуды болдырмау және уақытты үнемдеу үшін ипотеканы рәсімдеу алдында таңдалған нысанның нақты банктің талаптарына сай келетінін алдын ала тексеру ұсынылады.