Ауыл тұрғындары үшін күрделі медициналық диагностика қолжетімді бола түсті: «Қазақстан халқына» қоры Түркістан облысына компьютерлік томография, маммограф және ультрадыбыстық жабдықпен жарақталған екі заманауи жылжымалы медициналық кешен табыс етті, деп хабарлайды infohub.kz сайты.
Енді шалғай ауылдардың тұрғындары күрделі диагностика үшін облыс орталығына барып, уақыт пен ақша жұмсаудың қажеті жоқ. Дәрігерлер қауіпті ауруларды, соның ішінде онкологияны уақтылы анықтау үшін өздері барады.
Қазақ онкология және радиология ғылыми-зерттеу институтының мәліметінше, кешендердің біреуі заманауи компьютерлік томографпен, екіншісі маммографиялық жүйе мен эксперттік кластағы ультрадыбыстық жабдықпен жарақталған.
«Кешендер онкологиялық көмектің қолжетімділігін арттыруда ерекше маңызға ие. Жергілікті жерде компьютерлік томография, маммография және УДЗ жасау күдікті өзгерістерді уақтылы анықтап, пациенттерді қосымша тексеру мен емдеуге жіберуге мүмкіндік береді», — делінген хабарламада.
ҚазОжРҒЗИ басқарма төрағасы Ербол Бекмұхамбетовтің айтуынша, жылжымалы медициналық кешендер ҚР үш облысында тұрақты жұмыс істейді. Жыл сайын олардың көмегімен 22 мыңнан астам қазақстандық тексеруден өтеді. Олардың шамамен 40%-ы медициналық сақтандыруы жоқ азаматтар.
«Осы тексерулер барысында 1 409 обыр алды ауру және 627 қатерлі ісік жағдайы анықталды. Бұл нәтижелер ауыл тұрғындары үшін заманауи диагностиканың қолжетімділігін қамтамасыз етудің қаншалықты маңызды екенін көрсетеді», — деп атап өтті ол.
Бір ай бұрын «Курсив» Жамбыл облысының шалғай елді мекендеріне КТ, маммография және УДЗ аппараттары бар екі мобильді медициналық кешен жіберілгенін хабарлаған. Олар да «Қазақстан халқына» қорының қолдауымен сатып алынған.