Қазақстанда тұрғын үй кезегін сатуға байланысты жанжал өршіп тұр. «Отбасы банкі» басшысы Ләззат Ибрагимова үкіметтегі брифингте банк қызметкерлерінің ақылы түрде адамдарды тұрғын үй кезегінде ілгерілеткені туралы жағдайға түсініктеме берді, деп хабарлайды infohub.kz сайты.
Ләззат Ибрагимова банк қызметкерлерінің тұрғын үй кезегінде ілгерілету сияқты заңсыз қызметтер көрсеткенін растады. Ол банктің бұзушылықтарды өзі анықтап, бұл туралы хабарлағанын атап өтті. «Бұл жекелеген жағдай болды. Ол 2025 жылдың сәуір-мамыр айларында орын алды. Адам кезекте тұрды, бірақ неғұрлым жеңілдікті санатқа өту үшін өз санатын "Мүгедектігі бар балаларды тәрбиелеп отырған отбасылар" деп өзгерткен. Аталған екі қызметкермен еңбек шарты банк бастамасымен тоқтатылып, оларды қылмыстық жауапкершілікке тарту туралы өтініштер жолданды. Қылмыстық істер қозғалып, қазір тергеу жүріп жатыр. Бұл бір аймақтық филиал қызметкерлері мен орталық аппараттың бизнес-талдаушысы тарапынан жасалған алаяқтық әрекеттер туралы болып отыр», — деді ол.
Ибрагимованың айтуынша, бұл оқиға банктің жаңа ақпараттық жүйеге көшуіне дейін болған. «Біз үшін бұл үлкен сабақ болды: цифрландыру кезінде барлық цифрлық іздер — кім, қандай логинмен кірген, не істеген — сақталуы үшін орасан зор жұмыс істеу қажет. Ешқандай залал келтірілген жоқ, бөлінген пәтер несие шартына қол қою сатысында тоқтатылып, қайтарылды. Ол қайтадан тұрғын үй бөлуге қатысты», — деп түсіндірді спикер.
Еске салайық, бұған дейін Ибрагимова мемлекеттік қордан кезекте тұрғандарды тұрғын үймен қамтамасыз ету қарқыны туралы айтқан болатын.