Жаңа Зеландиялық аралас жекпе-жек шебері Навахо Стирлинг Белградта өткен UFC Fight Night турнирінің басты жекпе-жегінде поляк Ян Блаховичті тізе бүктірді. Бұл туралы infohub.kz сайты хабарлайды.
Бастапқыда Блахович Богдан Гуськовпен басты жекпе-жекте өнер көрсетуі тиіс еді, алайда өзбекстандық спортшы бір апта бұрын ресейлік Магомед Анкалаевпен қысқа мерзімде келісіп, жекпе-жекке шыққан болатын. Сөйтіп, поляк Стирлингпен басты жекпе-жекте кездесті.
Турнирге Блахович жеңіл ауыр салмақтағы (93 келіге дейін) рейтингтің төртінші сатысында тұрып келді, ал оның қарсыласы 15-орында еді. Жекпе-жек бес раундқа жоспарланған, бірақ мерзімінен бұрын аяқталды: алғашқы минуттарда-ақ Стирлинг қарсыласын оң қолымен басына дәл соққымен сілкіндіріп, оны аяқтап, төрешіні жекпе-жекті тоқтатуға мәжбүр етті.
28 жастағы жаңа зеландиялық үшін бұл жеңіс UFC-дегі алтыншы, ал кәсіби мансабындағы он бірінші жеңіс болды. Ол әлі жеңілістің дәмін татқан емес. Ал Блахович болса, жеңіссіз сериясын бес жекпе-жекке ұзартты (екі тең түскен ойын және үш жеңіліс). Ол соңғы рет 2022 жылдың мамыр айында жеңіске жеткен еді. 43 жастағы UFC-дің бұрынғы чемпионының еншісінде қазір ММА-да 29 жеңіс, 12 жеңіліс және екі тең ойын бар.
Белградтағы турнир промоушен тарихында Сербия аумағында өткен алғашқы турнир болды.