Украина Халықаралық азаматтық авиация ұйымына (ИКАО) Ресей әуе кеңістігінің азаматтық рейстер үшін қауіпсіз еместігін ресми түрде хабарлады. Бұл шешім президент Владимир Зеленскийдің авиакомпанияларға үндеуінен кейін қабылданды, деп хабарлайды infohub.kz сайты.
Euronews-тің жазуынша, Украина сыртқы істер министрі Андрей Сибига ИКАО-ға жіберілген хабарлама туралы мәлімдеді. Ол әлеуметтік желідегі парақшасында: «Украина ИКАО-ға Ресей әуе кеңістігінің әскери белсенділіктің артуына байланысты азаматтық авиация үшін қауіпсіз еместігін ресми хабарлады. Біз барлығын одан аулақ болуға шақырамыз», — деп жазды.
Министрдің айтуынша, Мәскеу «қолданыстағы қауіптерді әдейі елемейді». Сибига: «Бұл — ИКАО-ға, барлық авиакомпаниялар мен үкіметтерге сақтық шараларын сақтау үшін хабарлау — біздің жауапты шешіміміз, тіпті Ресей өз міндетін орындап, оларды хабардар етуден бас тартса да. Біз әдейі жасалмаған оқиғалардың алдын алғымыз келеді», — деп қосты.
РИА Новостидің хабарлауынша, Халықаралық азаматтық авиация ұйымы Киевтің Ресей әуе кеңістігіне қатысты мәлімдемелеріне жауап берді. Онда Халықаралық азаматтық авиация туралы конвенция ИКАО-ға мүше барлық мемлекеттерді азаматтық әуе кемелерінің қауіпсіздігін қамтамасыз етуге міндеттейтінін еске салды. Ұйымда: «Халықаралық азаматтық авиация туралы конвенция ИКАО-ға мүше барлық мемлекеттерді азаматтық әуе кемелерінің қорғалуын қамтамасыз етуге міндеттейді және оларға қарсы қару қолдануға тыйым салады», — деп атап өтті.
Бұған дейін Украина президенті Владимир Зеленский Telegram-арнасында Украина Қарулы Күштерінің шабуылдарына байланысты Ресей үстіндегі әуе кеңістігі қауіпсіз емес болып бара жатқанын мәлімдеген еді.