Ресей зымыраны Украинаның орталық бөлігіндегі Кривой Рог қаласының маңындағы ауылдағы жеке үйге соққы берді. Кривой Рог әскери әкімшілігінің басшысы Александр Вилкулдың айтуынша, Воронеж облысынан ұшырылған «Искандер-М» баллистикалық зымыраны үйді қиратып, 5 және 12 жастағы екі қыз бен төрт ересек адам қаза тапты. Тағы сегіз адам жараланды, қаза тапқандар саны артуы мүмкін. Бұл туралы infohub.kz хабарлайды.
Киевте бір адамның қазасын қала әскери әкімшілігі растады. Мэр Виталий Кличконың айтуынша, бірнеше ауданда өрт шыққан. Ол бұған дейін Telegram-да: «Жау астанаға баллистикалық қарумен шабуыл жасап жатыр. Шабуыл қаупі сақталып тұр. Баспаналарда болыңдар!» – деп жазды.
Батыстағы Львов қаласының мэрі Андрей Садовый Telegram-да ресейлік әуе шабуылынан тұрғын үйлердің зақымданғанын хабарлап, адамдарды баспана іздеуге шақырды.
Сәрсенбі күні кешке Украина президенті Владимир Зеленский Telegram-да: «Орыстар бірнеше күн бұрын жаппай шабуылға дайындалды және бүгін түнде соққы берілу ықтималдығы жоғары... Украинаның барлық өңірлерінде әуе шабуылы дабылына мән беріп, қауіпсіз жерде болыңыздар», – деп жазды.
Шабуыл кезінде Украинамен шекаралас Польша әуе кеңістігін қорғау үшін жойғыш ұшақтарын көтерді. Польша қарулы күштерінің мәлімдеуінше, «жойғыш ұшақтар мен ерте хабарлау ұшағы әрекет ете бастады, жердегі әуе қорғаныс жүйелері мен радарлық барлау жүйелері дайындық күйіне келтірілді».
Зеленский Украинаның одақтастарына Киевтің әуе қорғанысына жетіспейтін зымырандарды беру туралы өтінішін қайталады. «Біздің әріптестеріміз не болып жатқанын толық түсінуі маңызды, адамдардың өмірін қорғау тікелей олардың әуе қорғанысы зымырандарын беруге дайын немесе дайын еместігіне байланысты», – деді ол.
Ал Ресейдің батысындағы Пенза қаласында Wildberries интернет-дүкенінің қоймасы украиндық дрон шабуылынан өртенді. Облыс әкімі Олег Мельниченконың айтуынша, бір адам жараланып, 200-ге жуық адам эвакуацияланған.