Астанада тұрғын үйдің қасбеті құлап, жедел жәрдем фельдшері Ұлдана Мырзуанның өмірін қиған іс бойынша сотта зардап шеккендер айыпталушыға — мүлік иелері бірлестігінің (МИБ) төрайымы Сәуле Жұбаниязоваға азаматтық талап қойды. Тараптардың талап сомасы 45 млн теңгеден асты, деп хабарлайды infohub.kz сайты.
Бүгін сотта екі зардап шегушінің — Калиева мен Нұрпейісованың өкілдері моральдық және материалдық зиянды өндіру туралы азаматтық талап қою жөнінде өтініш білдірді.
Мәселен, Калиеваның адвокаты Сәуле Жұбаниязовадан 10 млн теңге, сондай-ақ өкіл шығыны ретінде 500 мың теңге өндіруді сұрады. Ол сондай-ақ 53 мың теңге көлемінде материалдық шығын бар екенін қосты.
Сонымен қатар Нұрпейісованың адвокаты оның сенім білдірушісіне есту аппараты қажет болатынын және оны болашақта ауыстырып отыру керектігін мәлімдеді. Адвокат Нұрпейісованы азаматтық талапкер деп тануды сұрап, материалдық шығын 322 554 теңге, ал моральдық зиян 35 млн теңге деп бағаланғанын айтты. Сондай-ақ ол Жұбаниязоваға есту аппаратын жоспарлы ауыстыру үшін әр екі жыл сайын 960 мың теңгеден төлеу міндетін жүктеуді сұрады.
Еске салайық, 2025 жылғы 8 қарашада Астанада тоғыз қабатты тұрғын үйдің қасбетінен сыртқы кірпіш қаптамасы мен кондиционер құлаған болатын. Оқиға орнында жедел жәрдем фельдшері зардап шекті — қыз қоқыс астынан ер адамды шығаруға тырысқанда, басына 9-қабаттан кондиционер құлаған. Жарақат алған қызға бас сүйегін трепанациялау жасалды.
18 қарашада фельдшердің қаза тапқаны белгілі болды.
2026 жылғы 18 тамызда Астанада Ұлдана Мырзуанның қаза табуына қатысты ашық сот процесі басталды. Айыпталушылар қатарында үй МИБ төрайымы Сәуле Жұбаниязова отыр.
Отырыс барысында зардап шеккендер — оқиғадан кейін мүгедектік алған Гүлнұр Калиева және қарындасының қоңырауымен көмекке асыққан ағасы сөз сөйледі.
Сондай-ақ сотта адамдарды құтқарған ТЖ қызметкерлерінің арасында жұмыстан шығару мен қызметтен төмендету орын алғаны анықталды.
Бұған қоса, куә ретінде Жұбаниязованың алдында осы қызметте істеген үйдің бұрынғы басқарушысы жауап берді. Оның айтуынша, үйдегі мәселелер 2020 жылға дейін де болған.
Сотта қаптамасы құлаған үйдің ауласында орнатылған бейнебақылау камераларының жазбасы да көрсетілді. Айыпталушы Сәуле Жұбаниязованың өзі үйдің сараптамасынан хабардар болғандар пәтерлерін сатып жібергенін айтты. Ол сондай-ақ тергеушінің оған күдікті мәртебесі берілгенін қалай хабарлағанын әңгімеледі.
Сонымен қатар сарапшы Бауыржан Қазиев қасбеттің құлауын сырттай қарау кезінде алдын ала болжау мүмкін болмағанын мәлімдеді. Тағы бір сарапшы — «Астана Технадзор» қызметкері Дмитрий Воробьев құлаудың себебі құрылыс сапасы екенін айтты. Ол сондай-ақ тұрғындар мамандардың көмегінсіз қасбеттің құлау мүмкіндігін біліп, оның алдын ала алмайтынын түсіндірді.