Жерорта теңізіңде биіктігі бір метрден асатын цунами туындау ықтималдығы алдағы отыз жылда 100%-ға жуық деп ескертеді сарапшылар, деп хабарлайды infohub.kz сайты.
ScienceDaily басылымының жазуынша, Француз Ривьерасы цунамидің ауыр қаупіне тап болып отыр. Кейбір жергілікті сценарийлерде алғашқы толқындар жағалауға 10 минуттан аз уақытта жетуі мүмкін. Ал Францияның ұлттық ескерту орталығына жер сілкінісінен кейін билікке алғашқы дабыл жіберу үшін 15 минутқа дейін уақыт қажет.
Осыған байланысты Ницца маңындағы ғалымдар мен жергілікті шенеуніктер жаяу эвакуация бағыттарын әзірлеп, баспана орындарын белгілеп, адамдар қауіпті аймақтардан уақытында шыға алуы үшін жаттығулар өткізуде.
Жерорта теңізі аймағында қауіпті толқындардың туындауына қажетті барлық әлеует бар. Себебі Лигурия теңізіндегі белсенді жарылымдар бойындағы жер сілкіністері немесе көшкіндер болуы мүмкін. Тарихта 1887 жылы жер сілкінісі Канн мен Антибте екі метрлік толқындар тудырғаны, сондай-ақ 1979 жылы Ниццадағы көшкін сегіз адамның өмірін қиғаны есте қалды. Мамандар тіпті аласа толқындардың өзі жоғары жылдамдығы мен күшті ағысына байланысты қауіпті болуы мүмкін екенін атап өтеді.
Тәуекелдерді азайту үшін Монпелье университетінің мамандары теңіз деңгейінен бес метрден төмен және жағалаудан 200 метрге дейінгі аумақты қамтитын эвакуация аймағын анықтады. Ницца метрополиясында Көгілдір жағалауда 100-ге жуық баспана жасалып, қауіпсіз жолдар салынды. Жүргізілген жұмыстың арқасында метрополия ЮНЕСКО-дан Tsunami Ready мәртебесін алды, бұл аймақтың ықтимал апатқа жоғары дайындығын растайды.