Ұйқысыздықтан зардап шегетін адамдар инсультке жиі ұшырап, ауруханаға түсуі мүмкін, сондай-ақ мидың кейбір аурулары мен психикалық бұзылыстарға шалдығу қаупі жоғары. Осындай тұжырымға халықаралық зерттеушілер тобы бұған дейінгі ғылыми еңбектердегі ұйқысыздықтың денсаулыққа тигізетін жеті салдары туралы деректерді талдай отырып келді, деп хабарлайды infohub.kz сайты.
Талдау нәтижелері Sleep Medicine Reviews журналында жарияланды. Ғалымдар MEDLINE және EMBASE медициналық базаларындағы 2025 жылдың тамызына дейін жарық көрген мақалаларды зерттеді. Шолуға сондай-ақ инсульт, өндірістік жарақаттар және ауруханаға түсуге арналған үш жаңа жүйелік шолу енгізілді.
Инсультке қатысты талдауға 1,3 миллионнан астам адамның деректері кірді. Ұйқысыздықтан зардап шегетіндерде инсульт қаупі осы ұйқы бұзылысы жоқ адамдармен салыстырғанда 26%-ға жоғары болды.
Сондай-ақ ұйқысыздық кез келген себеппен ауруханаға түсу ықтималдығының жоғарылауымен байланысты болды. Үш зерттеудің деректері бойынша ауруханаға түсу мүмкіндігі 28%-ға артқан.
Зерттеулер ұйқысыздықты депрессия және суицидтік мінез-құлықпен байланыстырды. Көптеген шолулар ұйқысыздық пен деменция арасындағы байланысты да анықтады, алайда жекелеген жұмыстардың нәтижелері әртүрлі болды.
Ұйқысыздық кезінде адам ұйықтауға мүмкіндігі болса да, ұйқыға кету немесе ұйқыны ұстап тұру қиындықтарын бастан кешіреді, бұл күндізгі қызметтің бұзылуымен қатар жүреді.
Авторлар алынған нәтижелер байланысты көрсететінін, бірақ ұйқысыздықтың инсультті, деменцияны немесе басқа ауруларды тікелей тудыратынын дәлелдемейтінін атап өтті. Зерттеу денсаулық жағдайын бағалау кезінде ұйқы бұзылыстарына көбірек көңіл бөлу қажеттігін көрсетеді.
Бұған дейін эндокринолог дәрігер Kursiv Health-ке ұйқы мәселелері кезінде мелатонинді қабылдау ережелері туралы айтқан болатын.