Венгрияда 24 жастағы ер адам мас күйінде жеңіл ұшақты ұрлап, «Пакш» атом электр станциясына бет алды. Әскерилер әуе кемесін ұстау үшін екі жойғыш ұшақты көтерді, деп хабарлайды infohub.kz сайты.
Оқиға 29 тамызда таңертең болды. Ер адам Калоча қаласындағы аэродромда тұрған ұшаққа рұқсатсыз отырып, Венгриядағы жалғыз АЭС орналасқан Пакш қаласына қарай ұшты.
Әскери радарлар әуе кемесін бірден анықтады. Осыдан кейін кезекшіліктегі Gripen жойғыш ұшақтары әуеге көтерілді, деді Венгрияның қорғаныс министрі.
«Пакш» АЭС-інен үш шақырым радиустағы әуе кеңістігі азаматтық авиация үшін 6 мың метр биіктікке дейін жабық. Венгриялық БАҚ деректеріне сәйкес, ұрланған ұшақ станция маңында қауіпті маневрлер жасаған.
Бірнеше минуттан кейін ол Герьен елді мекенінің жанындағы күнбағыс алқабына мәжбүрлі қону жасады. Ер адам зақымдалған ұшақты тастап, тас жолға шыққан.
Венгрия полициясының хабарлауынша, бір автокөлік жүргізушісі ер адамға көмектесу үшін тоқтаған. Ол көлікке отырып, кетуге тырысқан, алайда ішіндегі жолаушы оған кедергі жасаған.
Полиция күдіктіні бірнеше минут ішінде ұстады. Тексеру ер адамның мас күйінде болғанын растады. Құқық қорғау органдары оның басқа да заттарды қолданғанын анықтап жатыр.
Ұсталған адамға қатысты көлік құралын заңсыз иемдену және басқа да болжамды қылмыстар бойынша іс қозғалды. Полиция оны қамауға алуды сұрамақ.
Оқиғадан кейін полиция авиациялық органдармен бірлесіп, Калочадағы аэродромда тексеру бастады. Венгрияның басқа әуежайларында да осындай тексерулер жүргізу жоспарлануда.