Лондонның солтүстік-батысындағы Уэмбли стадионына жақын орналасқан қоқыс өңдеу кәсіпорнында ірі өрт шығып, аймақтағы метро мен пойыздар қозғалысы тоқтатылды. Бұл туралы infohub.kz хабарлайды.
Өртті сөндіруге 20 өрт сөндіру машинасы мен 125-ке жуық өрт сөндіруші жұмылдырылды. Оқиға стадионнан бір шақырымнан сәл аз қашықтықтағы Ниcден өнеркәсіп аймағындағы аралас қоқыс өңдейтін кәсіпорында болған.
Әлеуметтік желілерде тараған видеоларда аспанға көтерілген қара түтін көрінеді. Өрт туралы 70-тен астам қоңырау түскен.
Лондон көлік басқармасының мәліметінше, өрт ошағына жақын орналасқан Метрополитан желісінің бүкіл бағыты бойынша қозғалыс тоқтатылған. Джубили желісінде Уэмбли Парк пен Вест Хэмпстед аралығында пойыздар жүрмейді, қалған бөлігінде қатты кідірістер бар. Лондон Мэрилебон бағытындағы теміржол қатынасы да бұзылған.
PA Media мәліметінше, өртке қатысы жоқ жақын маңдағы Amazon қоймасы эвакуацияланған.
Лондон өрт сөндіру қызметі: «Өрт сөндірушілер жұмыс істеп жатқанда Метрополитан және Джубили желілеріндегі метро қозғалысына әсер етеді. Сондай-ақ, осы өртке байланысты Лондон Мэрилебон бағытындағы теміржол қатынасы да бұзылды», — деп мәлімдеді.
Өрттің шығу себебі әзірге белгісіз.
Бұл — Лондонда биыл жазда қайта өңдеу орталығында болған үшінші ірі өрт. Алдыңғы екеуі қаланың оңтүстік-шығысындағы Ландман Уэй қайта өңдеу және қалпына келтіру орталығында тіркелген.
Қоршаған орта қызметтері қауымдастығының деректеріне сәйкес, қате тасталған литий батареяларынан (мысалы, вейптердегі) болатын өрттер аптасына 10 реттен астам тіркеледі. Қоқыс өңдеу кәсіпорындарындағы батарея өрттері жылына 1 миллиард фунт стерлинг шығын келтіреді және өрт сөндіру қызметтерінің наразылығын тудыруда.