1 қазаннан бастап WhatsApp бизнес-аккаунттарға қатысты ережелерін өзгертеді: компаниялар WhatsApp Business Platform арқылы клиенттерге жіберілетін хабарламалар үшін төлем жасауға мәжбүр болады. Қазақстанда тариф шамамен $0,018, яғни әр хабарлама үшін 8 теңге болады, деп хабарлайды infohub.kz сайты.
Сонымен қатар әрбір бизнес-нөмірге айына 1 000 тегін хабарлама беріледі. Осы шектен асқан соң компаниялар одан әрі жіберілетін хабарламалар үшін төлей бастайды. Мысалы, компания бір айда 10 мың осындай хабарлама жіберсе, оның 9 мыңы үшін төлем жасайды. Бұл шамамен $162, немесе 72 мың теңгеге жуық соманы құрайды.
Клиенттер хабарламалар үшін төлем жасамайды. Өзгерістер WhatsApp Business Platform мен автоматты таратылымдар, CRM, чат-боттар және басқа да сервистерді пайдаланатын кәсіпкерлерге қатысты.
Бұл Қазақстан үшін әсіресе өзекті. WhatsApp Business-ті бізде ірі компаниялар ғана емес, шағын кәсіпкерлер, дүкендер, шеберлер және басқа да мамандар пайдаланады. Оның үстіне олардың көбі жаппай таратылымдарды белсенді қолданады.
Бұған дейін Kursiv LifeStyle WhatsApp топтық чаттарға ірі жаңарту ұсынғанын жазған болатын.