Әзірет Сұлтан ұлттық тарихи-мәдени музей-қорығының Ясауитану ғылыми орталығының мамандары Мәскеуге ғылыми экспедиция барысында Ясауи тариқатының тарихы мен рухани іліміне арналған, бұрын аз белгілі XVII ғасырдағы қолжазбаны тапты, деп хабарлайды infohub.kz.
Табылған қолжазба «Худжжат аз-закирин ли-радд аль-мункирин» деп аталады, бұл аудармада «Зікір етушілердің оны теріске шығарушыларға қарсы дәлелі» дегенді білдіреді. Туынды Бұхарада жасалған және Ясауи мектебінің тарихы бойынша маңызды жазба дереккөз саналады.
Қолжазбада сопылық тәрбие принциптері, жария зікір дәстүрі және рухани сабақтастық қарастырылады. Құжатта Қожа Ахмет Ясауи, Хаким ата, Зәңгі ата және тариқаттың кейінгі өкілдеріне тарайтын рухани тізбек туралы мәліметтер бар.
Қазіргі уақытта мамандар қолжазбаның ғылыми сипаттамасын дайындап жатыр. Одан кейін мәтін туындының бұрын белгілі тізімдерімен салыстырылып, текстологиялық талдау жүргізіледі, ал зерттеу нәтижелері ғылыми айналымға енгізіледі.