Қазақстандық теннисші Юлия Путинцева (әлемдегі 82-орын) Армения атынан өнер көрсететін Алина Чараеваны (118-орын) 6:3, 6:3 есебімен сенімді жеңіп, Румынияның Яссы қаласында өтіп жатқан WTA-250 Unicredit Iasi Open турнирінің ширек финалына шықты, деп хабарлайды infohub.kz сайты.
Бірінші айналымда Путинцева американдық Клер Люді (111) 7:5, 6:4 есебімен ұтты. Чараева үшін бұл турнир WTA-250 деңгейіндегі алғашқы жеңіс болды. Ол бастапқы матчта Андорра өкілі Виктория Хименес-Касинцеваны (114) 6:0, 6:1 есебімен тас-талқан етті. Ресейдің Самара қаласында туып, Испанияда жаттығатын 24 жастағы теннисші кәсіби жолын жаңа бастаған.
Бұрын әлем рейтингінің үздік 20-лығына кірген Путинцеваның тәжірибесі мен шеберлігі бірінші партияда байқалды. Ол алғашқы геймде қарсыласының подачасын алып, тоғызыншы геймде екінші брейк жасады — 6:3.
Екінші сетте бойы ұзын (183 см, Путинцевада 163 см) және Australian Open-тың екі дүркін чемпионы Светлана Кузнецованың жетекшілігімен жаттығатын Чараева белсенді ойнады. Ол бірден брейк жасап, басымдылығын арттырды — 2:0. Алайда қазақстандық төртінші брейк-пойнттан кейін есепті теңестіріп, алға шықты (4:3) және тағы бір брейк жасады. Путинцева екінші матчболда кездесуді 1 сағат 33 минутта аяқтады — 6:3, 6:3. Матч барысында Путинцева үш эйс берді (қарсыласында бір), ұтыс очколары 68-52 өз пайдасына болды.
Ширек финалда Путинцева мысырлық Майар Шериф (97) пен испандық Кейтлин Кеведоның (100) арасындағы матч жеңімпазымен кездеседі.
Алина Чараева сол күні тағы бір матч өткізеді — жұптық сында қазақстандық Жибек Куламбаевамен (174) бірге ресейлік Мария Козырева (59) мен Елена Приданкинаға (76) қарсы ойнайды.
Жекелей турнирдің іріктеуінде Куламбаева испандық Лейра Ромеро Горместен (143) 1:6, 4:6 есебімен жеңілді.
Unicredit Iasi Open турнирі топырақ кортында 2022 жылы пайда болды. 2025 жылы ол WTA күнтізбесіндегі Венгрия Гран-приінің орнын иеленіп, «250» санатын алды. Жекелей сында үш рет румындықтар жеңіске жетті, бірақ 2024 жылы ресейлік жасөспірім Мирра Андреева чемпион атанды. 2024 жылы жұптық сында қазақстандық Анна Данилина мен ресейлік Ирина Хромачева жеңімпаз болды.
2026 жылғы турнирдің жүлде қоры 283 350 долларды құрайды. Бірінші нөмірлі румындық Жаклин Кристиан (37) соңғы сәтте жарыстан бас тартты, сөйтіп оның орнын Путинцева алды.