Дональд Трамп әкімшілігі шетелдік журналистерге виза беру ережелерін қатайтып, олардың әлеуметтік желідегі аккаунттарын тексеруді енгізуді жоспарлап отыр, деп хабарлайды infohub.kz сайты.
Bild басылымы The Daily Signal-ге сілтеме жасап хабарлағандай, визаға өтініш берушілердің кейбір санаттары, оның ішінде шетелдік журналистер, Instagram, Facebook және X-тегі профильдерін жұртшылыққа ашық етуге міндеттеледі. Ол үшін жабық аккаунттарды ашыққа ауыстыру қажет болады.
Бұл жоспарлардың ресми растауы әзірге жоқ. Дегенмен, Ақ үйдің баспасөз хатшысы Кэролайн Левитт X-те бұл туралы жазба жариялады, бірақ тікелей растамады. АҚШ Мемлекеттік департаменті де әзірге егжей-тегжейін ашпайды. Сұранысқа жауап ретінде оның өкілі: «Мәселе өтініш берушілердің АҚШ заңнамасына сәйкес виза алу құқығын дәлелдеуі және ешкімнің Америка Құрама Штаттарының қауіпсіздігіне қауіп төндірмеуін қамтамасыз ету туралы болып отыр», — деді.
Қазірдің өзінде АҚШ визасының кейбір санаттарына, мысалы, студенттік визаға өтініш берушілер өздерінің онлайн-аккаунттарын ашуы керек. Енді бұл тәжірибе басқа санаттарға да таралуы мүмкін.
Айта кетейік, өткен айда Трамп әкімшілігі шетелдік журналистер мен студенттердің елде болу мерзімін шектейтінін де жариялады. Студенттік визалар ең көбі төрт жылға, ал шетелдік журналистерге арналған визалар ең көбі 240 күнге (ұзартуға өтініш беру мүмкіндігімен) берілетін болады. Туристер үшін де жақын арада қатаң ережелер енгізілуі мүмкін. АҚШ үкіметінің биылғы жылдың басында белгілі болған жоспарларына сәйкес, олар да әлеуметтік желілерді пайдалануы туралы ақпаратты ашуға міндеттелуі ықтимал.