Шығыс Қазақстан облысындағы Зайсан көлінде іздеу-құтқару жұмыстары аяқталды: қайық аударылғаннан кейін суға кеткен екі ер адамның денесі судан алынды, деп хабарлайды infohub.kz сайты.
Төтенше жағдайлар министрлігінің ресми Telegram-арнасында мәлім болғандай, іздеу жұмыстары Тарбағатай ауданының Тұғыл ауылдық округінде жүргізілді.
«15 қыркүйекте үш ер адам көлде қайықпен балық аулап жүрген. Қатты желдің салдарынан қайық аударылып кетті. 1968 жылы туған балықшылардың біреуі судан өз бетінше шыға алды. Оны жергілікті тұрғындар құтқарып алды. 1968 және 1995 жылы туған екі ер адам суға кетті. Оларда құтқару жилеттері болмаған», — деп атап өтті ТЖМ.
Ведомствоның дерегінше, ақпарат түскен сәттен бастап оқиға орнында ТЖМ жедел штабы орналастырылды. Іздеу-құтқару жұмыстарына ТЖМ бөлімшелерінің күштері мен құралдары тартылды: сүңгуірлер, құтқару катерлері, қайықтар және басқа да жүзу құралдары, ұшқышсыз ұшу аппараттары, суасты дроны, сондай-ақ жергілікті тұрғындар.
Бүгін іздеу жұмыстары барысында жергілікті тұрғындар 1968 жылы туған ер адамның денесін тапты. Екінші қаза тапқан 1995 жылы туған адамның денесін ТЖМ сүңгуірлері жағадан 8,9 км қашықтықта тапты. Іздеу жұмыстары тәулік бойы жүргізілді. Құтқарушылар көлдің айтарлықтай акваториясын, оның ішінде суасты техникалық құралдарын пайдаланып тексерді. ТЖМ сүңгуірлері 8 рет сүңгу жасады.
Құтқару бөлімшелерінің жұмысын көлдің айтарлықтай тереңдігі, түбінің күрделі рельефі және су астындағы шектеулі көріну қиындатты.