Өскемендегі өнеркәсіптік арматура зауыты 2025 жылды 522 млн теңге шығынмен аяқтады, ал бір жыл бұрын кәсіпорын 1,9 млрд теңге пайда тапқан еді. Бұл компанияның қаржылық есептілігінде көрсетілген, деп хабарлайды infohub.kz.
Шығын сатып алушылармен жасалған келісімшарттардан түскен табыстың 26%-ға – 9,1 млрд теңгеге дейін төмендеуіне, сондай-ақ шығыстардың өсуіне байланысты. Кәсіпорынның әкімшілік шығыстары 182 млн теңгеге өсті, оның ішінде салықтар (96 млн теңгеге дейін) және қызметтер (63 млн теңгеге дейін) бойынша шығындардың артуы есебінен. Сонымен қатар, компания қаржылық шығыстарын екі есеге – 1 млрд теңгеге дейін ұлғайтты, бұл ұзақ мерзімді қарыздың әділ құнын қайта бағалаумен байланысты.
2025 жылдың соңында компанияның қарыздары 4,1 млрд теңгені құрады, бір жыл ішінде 216 млн теңгеге өсті. Негізгі кредиторлар – Bank RBK (1,7 млрд теңге) және Ұлыбританияда тіркелген Silverman Ventures компаниясы (1,79 млрд теңге).
Өскемендегі өнеркәсіптік арматура зауыты мұнай және газ құбырларына арналған құбыр арматурасын, сондай-ақ мұнай және газ кәсіпшіліктеріне арналған жабдықтарды шығаруға маманданған.
Кәсіпорын акцияларының 80%-ы «Мицар 2013» компаниясына тиесілі, оның иесі – Гүлнара Чайжунусова. Тағы 10%-дан Валентина Сим мен Динара Ашимовада. Аффилиирленген тұлғалар туралы деректерге сәйкес, Гүлнара Чайжунусова компания директорлар кеңесінің мүшесі Сергей Чайжунусовтың жұбайы болуы мүмкін.
Чайжунусовтар отбасы Шығыс Қазақстанда танымал және аймақтың бизнесі мен саясатында маңызды рөл атқарады. Әулеттің негізін қалаушы – еңбек сіңірген педагог Жақия Чайжунусов. Оның ұлы Маркен Чайжунусов Семей қаласының әкімі және парламент депутаты болған. Тағы бір ұлы, Тоқан Чайжунусов құрылыс саласында жұмыс істеп, «Востокказколхозстройды» басқарған және «Казгипроцветметтің» президенті болған.
Өз кезегінде, оның ұлы Сергей Чайжунусов түсті металлургия кәсіпорындарын жобалау бойынша жетекші компания «Казгипроцветметтің» құрылтайшысы, сондай-ақ көптеген басқа тау-кен, сауда және ауыл шаруашылығы компанияларының негізін қалаушы болып табылады.
Сергей Чайжунусовтың інісі Дален Чайжунусовқа 2018 жылы Дариға Назарбаеваның қызы Венера тұрмысқа шыққан.