Жамбыл облысында тұрғын үй-коммуналдық шаруашылық мекемесінде эколог болып жұмыс істеген әйел қар тазалау кезінде ауыр өндірістік жарақат алды. Оқиға 2023 жылдың желтоқсанында болған: әйел көше сыпырып жүріп тайып кетіп, құлап қалған. Қордай аудандық соты жұмыс беруші мен жұмыскер арасындағы бітімгершілік келісімін бекітіп, оған 1,6 млн теңге төленетін болды, деп хабарлайды infohub.kz сайты.
Жамбыл облысы соттарының ресми Telegram-арнасында хабарланғандай, Қордай аудандық соты денсаулыққа келтірілген зиянды өтеу туралы азаматтық істі қарады. Жазатайым оқиғада жұмыс берушінің кінәсі 100% деп танылды.
Медициналық қорытындыға сәйкес, әйелдің еңбекке қабілеттілігі 50% жоғалған. Оған қосымша медициналық көмек және әлеуметтік оңалту, оның ішінде санаторий-курорттық емдеу ұсынылған.
Талап қоюшы сотқа денсаулыққа келтірілген зиянды өтеуді және медициналық ұсыныстарда көзделген емделуді қамтамасыз етуді сұрап жүгінген. Сот талқылауы барысында тараптар келісімге келіп, өзара тиімді шарт жасасты.
Келісім шарты бойынша жұмыс беруші сот ұйғарымы заңды күшіне енгеннен кейін үш жұмыс күні ішінде әйелге 1,6 млн теңге төлеуге міндеттенді. Келісім бекітіліп, іс бойынша іс жүргізу тоқтатылды. Ұйғарым заңды күшіне енді.